KHwabon se rishta

mere hamrāz ai mire hamdam

mere sāthī mire sharīk-e-safar

is qadar kyoñ niDhāl ho bolo

is qadar kyoñ udaas ho bolo

tum ne ḳhvāboñ se rishta kyoñ toḌā

aur āñkheñ thakan se chuur haiñ kyoñ

kyoñ qadam ruk ga.e mire sāthī

hai safar to abhī bahut baaqī

aur manzil bahut hai duur abhī

kuchh batāo ki kyoñ ḳhamosh ho tum

kyoñ bhaTakne lage ḳhayāloñ meñ

ye na samjho ki dukh tumhārā hai

ye na socho ki tum akele ho

har qadam par tumhāre saath huuñ maiñ

laao de do tum apne dukh saare

maiñ tumhāre ġhamoñ ko pyaar karūñ

aur talvoñ ke ābloñ ko bhī

apne ashkoñ se ḳhud maiñ saaf karūñ

jitne kāñTe chubheñ haiñ chun luuñ maiñ

phir koī ḳhvāb bhar duuñ āñkhoñ meñ

tābnākī hayāt ko de duuñ

raste-raste ko murġh-zār karūñ

jis se rāhat mile tumheñ hamdam

jis se sāñseñ bhī mushk-bār baneñ

phuul hoñToñ pe muskurā uTTheñ

aur umañgeñ javān hoñ jis se

hausla tum ko jis se mil jaa.e

aur āñkheñ tumhārī ḳhvāb buneñ

jis se tum fāsloñ ko tai kar lo

reg-zāroñ meñ muskurā ke chalo

rāh-e-manzil meñ tum kabhī na ruko

ki

jo manzil pukārtī hai tumheñ

vahī manzil hai merī manzil bhī

merī jannat tumhārī ḳhushiyāñ haiñ

tum ne samjhā hai jis ko ḳhāk-e-pā

vo chamakte hue sitāre haiñ

un sitāroñ se maañg maiñ ne bharī

un sitāroñ se zindagī hai mirī

un sitāroñ se zarfishāñ hai hayāt

mere lab par haiñ pyaar kī sargam

un se khilte haiñ ārizoñ pe kañval

un se āñkhoñ meñ ḳhvāb palte haiñ

jin se din lā-javāb hote haiñ

laao de do tum apne dukh saare

maiñ tumhāre ġhamoñ ko pyaar karūñ

hausla tum ko jis se mil jaa.e

aur āñkheñ tumhārī ḳhvāb buneñ

mere hamraaz ai mere hamdam

mere sathi mere sharik-e-safar

is qadar kyon niDhaal ho bolo

is qadar kyon udas ho bolo

tum ne KHwabon se rishta kyon toDa

aur aankhen thakan se chur hain kyon

kyon qadam ruk gae mere sathi

hai safar to abhi bahut baqi

aur manzil bahut hai dur abhi

kuchh batao ki kyon KHamosh ho tum

kyon bhaTakne lage KHayalon mein

ye na samjho ki dukh tumhaara hai

ye na socho ki tum akele ho

har qadam par tumhaare sath hun main

lao de do tum apne dukh sare

main tumhaare ghamon ko pyar karun

aur talwon ke aablon ko bhi

apne ashkon se KHud main saf karun

jitne kanTe chubhen hain chun lun main

phir koi KHwab bhar dun aankhon mein

tabnaki hayat ko de dun

raste-raste ko murgh-zar karun

jis se rahat mile tumhein hamdam

jis se sansen bhi mushk-bar banen

phul honTon pe muskura uTThen

aur umangen jawan hon jis se

hausla tum ko jis se mil jae

aur aankhen tumhaari KHwab bunen

jis se tum faslon ko tai kar lo

reg-zaron mein muskura ke chalo

rah-e-manzil mein tum kabhi na ruko

ki

jo manzil pukarti hai tumhein

wahi manzil hai meri manzil bhi

meri jannat tumhaari KHushiyan hain

tum ne samjha hai jis ko KHak-e-pa

wo chamakte hue sitare hain

un sitaron se mang main ne bhari

un sitaron se zindagi hai meri

un sitaron se zarfishan hai hayat

mere lab par hain pyar ki sargam

un se khilte hain aarizon pe kanwal

un se aankhon mein KHwab palte hain

jin se din la-jawab hote hain

lao de do tum apne dukh sare

main tumhaare ghamon ko pyar karun

hausla tum ko jis se mil jae

aur aankhen tumhaari KHwab bunen