KHwatin ka bank

sunte haiñ shahr meñ jo ḳhvātīn kā hai bank

parvez kā nahīñ hai ye parvīn kā hai bank

rakkhī haiñ is liye yahāñ ḳhātūn manager

is mohkme ko chāhiye bātūn manager

ladies ittihād jo begānagī se hai

kyā jaane ḳhauf kyā unheñ mardāngī se hai

nok-e-zabāñ bhī chalne lagī hai zabāñ ke saath

beTī bhī hai sharīk laḌā.ī meñ maañ ke saath

har nāznīñ ke sāmne ik beauty-box hai

baaqī rakhā hai ghar meñ ye thoḌā sā aks hai

baiThī haiñ apne sāmne gesū sañvār ke

locker meñ rakh diyā hai dupaTTa utaar ke

chaTḳhāre haiñ zabāñ pe nazar meñ ishāre haiñ

har māh-vash ke pars meñ imlī kaTāre haiñ

jo baat kar rahī haiñ kamā.ī ke shobe kī

vo head haiñ lagā.ī-bujhā.ī ke shobe kī

kal saas se zabān ke bal par laḌī haiñ ye

ilm-e-lissniyāt meñ p.hd haiñ ye

khāte kī in ko fikr na ledger kī fikr hai

nandoñ kī ġhībateñ haiñ to devar kā zikr hai

shādī ke ba.ad nuqta banīñ dash ho ga.iiñ

pahle jo check-bōk thiiñ vo ab cash ho ga.iiñ

har nāznīñ kī umr bhī ḳhufiya account hai

kyā jaane in kī umr meñ kitnā amount hai

ye husn kā ḳhazāna koī kyā dabochegā

Daaku bhī Daaka Dālne se pahle sochegā

nākāra shauharoñ ko bhī debit karā.ī.e

nisvāniyat yahāñ se credit karā.ī.e

sunte hain shahr mein jo KHwatin ka hai bank

parwez ka nahin hai ye parwin ka hai bank

rakkhi hain is liye yahan KHatun manager

is mohkme ko chahiye baatun manager

ladies ittihad jo beganagi se hai

kya jaane KHauf kya unhen mardangi se hai

nok-e-zaban bhi chalne lagi hai zaban ke sath

beTi bhi hai sharik laDai mein man ke sath

har naznin ke samne ek beauty-box hai

baqi rakha hai ghar mein ye thoDa sa aks hai

baiThi hain apne samne gesu sanwar ke

locker mein rakh diya hai dupaTTa utar ke

chaTKHare hain zaban pe nazar mein ishaare hain

har mah-wash ke pars mein imli kaTare hain

jo baat kar rahi hain kamai ke shobe ki

wo head hain lagai-bujhai ke shobe ki

kal sas se zaban ke bal par laDi hain ye

ilm-e-lissniyat mein phd hain ye

khate ki in ko fikr na ledger ki fikr hai

nandon ki ghibaten hain to dewar ka zikr hai

shadi ke baad nuqta banin dash ho gain

pahle jo check-book thin wo ab cash ho gain

har naznin ki umr bhi KHufiya account hai

kya jaane in ki umr mein kitna amount hai

ye husn ka KHazana koi kya dabochega

Daku bhi Daka Dalne se pahle sochega

nakara shauharon ko bhi debit karaie

niswaniyat yahan se credit karaie