kisan

safed duudh sī ujlī kapās is kī hai

ye khet us ke haiñ shān-e-libās is kī hai

sukūñ kī niiñd hai maḳhmal kī ghaas is kī hai

ki phuul phuul meñ ḳhushbū hai baas is kī hai

mire vatan mire khetoñ kī shaan kyā kahne

har ek shahr ko shīr-o-shakar bhī detā hai

vahī kisān jo ḳhūn-e-jigar bhī detā hai

amīr-e-shahr ko vo sīm-o-zar bhī detā hai

ba-nām-e-ḳhosha-e-gandum guhar bhī detā hai

mire vatan mire khetoñ kī shaan kyā kahne

baġhair is ke nahīñ ān-bān dillī kī

isī ke naam se baaqī hai shaan dillī kī

ye mutma.in hī na hogā to kaisī shādābī

har ek samt añdhere tamām be-ḳhvābī

mire vatan mire khetoñ kī shaan kyā kahne

isī ke dam se ubhartī hai hind kī tasvīr

isī ke naam sañvartī hai hind kī taqdīr

tamām khet haiñ shādāb hind kī tafsīr

baġhair is ke nahīñ ḳhvāb-e-hind kī ta.abīr

mire vatan mire khetoñ kī shaan kyā kahne

bahār is meñ nahīñ hai to phir chaman kyā hai

ye gulsitāñ hī nahīñ hai to bāñkpan kyā hai

jo tarjumāñ na ho is kī to anjuman kyā hai

bayāñ isī kā nahīñ hai to phir suḳhan kyā hai

mire vatan mire khetoñ kī shaan kyā kahne

hukūmateñ bhī isī kī haiñ raaj bhī is kā

adālateñ bhī haiñ ye taḳht-o-tāj bhī is kā

har ek daur thā is kā ye aaj bhī is kā

badalte rangoñ se nikhrā samāj bhī is kā

mire vatan mire khetoñ kī shaan kyā kahne

safed dudh si ujli kapas is ki hai

ye khet us ke hain shan-e-libas is ki hai

sukun ki nind hai maKHmal ki ghas is ki hai

ki phul phul mein KHushbu hai bas is ki hai

mere watan mere kheton ki shan kya kahne

har ek shahr ko shir-o-shakar bhi deta hai

wahi kisan jo KHun-e-jigar bhi deta hai

amir-e-shahr ko wo sim-o-zar bhi deta hai

ba-nam-e-KHosha-e-gandum guhar bhi deta hai

mere watan mere kheton ki shan kya kahne

baghair is ke nahin aan-ban dilli ki

isi ke nam se baqi hai shan dilli ki

ye mutmain hi na hoga to kaisi shadabi

har ek samt andhere tamam be-KHwabi

mere watan mere kheton ki shan kya kahne

isi ke dam se ubharti hai hind ki taswir

isi ke nam sanwarti hai hind ki taqdir

tamam khet hain shadab hind ki tafsir

baghair is ke nahin KHwab-e-hind ki tabir

mere watan mere kheton ki shan kya kahne

bahaar is mein nahin hai to phir chaman kya hai

ye gulsitan hi nahin hai to bankpan kya hai

jo tarjuman na ho is ki to anjuman kya hai

bayan isi ka nahin hai to phir suKHan kya hai

mere watan mere kheton ki shan kya kahne

hukumaten bhi isi ki hain raj bhi is ka

adalaten bhi hain ye taKHt-o-taj bhi is ka

har ek daur tha is ka ye aaj bhi is ka

badalte rangon se nikhra samaj bhi is ka

mere watan mere kheton ki shan kya kahne