kitaben tum se achchhi hain

kitābeñ tum se achchhī haiñ

sirhāne ke bahut nazdīk jo

is tarah merī muntazir rahtī haiñ jaise

koī laḌkī ḳhvāb kī dahlīz se

anjān shahzāde kī rāheñ dekhtī ho

kitābeñ tum se achchhī haiñ

ki jab maiñ shaam ko

din bhar mashaqqat kar ke un ke paas aatā huuñ

to ye apnī qabā.eñ khol kar

alfāz kī ḳhushbū basātī

merī bāñhoñ meñ samātī haiñ

ye merī aañkh meñ ḳhush-rang nazzāre samo kar

mere hoñToñ par

sadā-e-harf rakhtī haiñ

to yuuñ mahsūs hotā hai

ki jaise qaaf kī koī parī

hoñToñ pe mere

apnī nāzuk uñgliyoñ kā lams rakhtī ho

kitābeñ tum se achchhī haiñ

maiñ jis mauzūa par chāhūñ

ye mujh se baat kartī haiñ

milā kar mere shāne se ye shāna

āgahī ke rāste par saath chaltī haiñ

kitābeñ tum se achchhī haiñ

mirī āñkhoñ kī be-ḳhvābī samajhtī haiñ

so mujh ko loriyāñ de kar

mirī nīñdoñ ko ḳhvāboñ se sajātī haiñ

mire siine pe sar rakh kar

mujhe furqat ke zholīda ḳhayāloñ se bachātī haiñ

kitaben tum se achchhi hain

sirhane ke bahut nazdik jo

is tarah meri muntazir rahti hain jaise

koi laDki KHwab ki dahliz se

anjaan shahzade ki rahen dekhti ho

kitaben tum se achchhi hain

ki jab main sham ko

din bhar mashaqqat kar ke un ke pas aata hun

to ye apni qabaen khol kar

alfaz ki KHushbu basati

meri banhon mein samati hain

ye meri aankh mein KHush-rang nazzare samo kar

mere honTon par

sada-e-harf rakhti hain

to yun mahsus hota hai

ki jaise qaf ki koi pari

honTon pe mere

apni nazuk ungliyon ka lams rakhti ho

kitaben tum se achchhi hain

main jis mauzua par chahun

ye mujh se baat karti hain

mila kar mere shane se ye shana

aagahi ke raste par sath chalti hain

kitaben tum se achchhi hain

meri aankhon ki be-KHwabi samajhti hain

so mujh ko loriyan de kar

meri nindon ko KHwabon se sajati hain

mere sine pe sar rakh kar

mujhe furqat ke zholida KHayalon se bachati hain