koi ojhal duniya hai

lamha lamha roz-marra zindagī ke saath hai

ek lamha jo kisī aaise jahāñ kī zindagī kā haath hai

jis meñ maiñ rahtā nahīñ jis meñ koī rahtā nahīñ

jis meñ koī din nahīñ hai raat kā pahrā nahīñ

jis meñ suntā hī nahīñ koī na koī baat hai

roz-marra zindagī se yuuñ guzartā hai kabhī

saath le jaatā hai guzrī umr ke hisse kabhī

jo basar ab tak huā us ko ġhalat kartā huā

aur hī ik zindagī se āshnā kartā huā

jo gumāñ tak meñ na thā us ko dikhā jaatā huā

vahm tak jis kā na thā us vaqt ko laatā huā

phir chalā jaatā hai apne asl ke āsār meñ

aur ham masrūf ho jaate haiñ phir

apne roz-o-shab ke kārobār meñ

lamha lamha roz-marra zindagi ke sath hai

ek lamha jo kisi aaise jahan ki zindagi ka hath hai

jis mein main rahta nahin jis mein koi rahta nahin

jis mein koi din nahin hai raat ka pahra nahin

jis mein sunta hi nahin koi na koi baat hai

roz-marra zindagi se yun guzarta hai kabhi

sath le jata hai guzri umr ke hisse kabhi

jo basar ab tak hua us ko ghalat karta hua

aur hi ek zindagi se aashna karta hua

jo guman tak mein na tha us ko dikha jata hua

wahm tak jis ka na tha us waqt ko lata hua

phir chala jata hai apne asl ke aasar mein

aur hum masruf ho jate hain phir

apne roz-o-shab ke karobar mein