koi surat aisi

kitnī tāḳhīr se mahr ubhrā tirī mehr kā aaj

ḳhīra āñkhoñ kī hai majbūrī koī dhuñdlā-pan

sāmne aa jā magar dhīmī zarā saañs kī lau

aur sulgā de koī biite samay kā sandal

phir ḳhamoshī kī kaThalī meñ sabhī yādeñ uñDel

saiñt kar dil ke nihāñ-ḳhāne se lā.ūñ maiñ bhī

dāstāneñ ki jinheñ hoñT na unvān mile

gūñdh kar arq-e-nadāmat meñ ba-sad-fan-kārī

un se phir donoñ kashīdeñ koī sūrat aisī

uñgliyāñ jis pe na uTTheñ haañ nigāheñ uTheñ

vaqt kā reg-e-ravāñ jis ko na dhuñdlā paa.e

jis kā rūmān na le jaa.e kahīñ maazī meñ

jis ke maujūd hī meñ ḳhud ko samoyā jaa.e

vaqt-e-ā.inda ko bhī jis meñ Duboyā jaa.e

kitni taKHir se mahr ubhra teri mehr ka aaj

KHira aankhon ki hai majburi koi dhundla-pan

samne aa ja magar dhimi zara sans ki lau

aur sulga de koi bite samay ka sandal

phir KHamoshi ki kaThali mein sabhi yaaden unDel

saint kar dil ke nihan-KHane se laun main bhi

dastanen ki jinhen honT na unwan mile

gundh kar arq-e-nadamat mein ba-sad-fan-kari

un se phir donon kashiden koi surat aisi

ungliyan jis pe na uTThen han nigahen uThen

waqt ka reg-e-rawan jis ko na dhundla pae

jis ka ruman na le jae kahin mazi mein

jis ke maujud hi mein KHud ko samoya jae

waqt-e-ainda ko bhi jis mein Duboya jae