kuchh aur ho bhi to raegan hai

havā.eñ bhī

bādbāñ bhī mere

samundaroñ ke sukūt meñ

be-libās nasloñ ke reza reza jamāl ke sab nishāñ bhī mere

mire shikasta vajūd kī

lahlahātī fasloñ pe

girne vaalī shafīq shabnam meñ ret ke āsmāñ bhī mere

qadīm lafzoñ ke ġham meñ be-jān manzaroñ ke jahāñ bhī mere

sitāra-e-dil kī vus.atoñ meñ

khile hue jañgaloñ ke asrār sā.atoñ ke gumāñ bhī mere

mire tasavvur ke bojh se TūTtī zamīñ par

halāk hote hue laboñ par vafāoñ ke sab nishāñ bhī mere

gulāb-chehroñ pe

sabz āñkhoñ ke manzaroñ meñ

najāt-e-ġham kī shikasta ḳhvāhish kī raakh merī bujhe hue kārvāñ bhī mere

jo kho ga.e

aur jo aane vaale dinoñ kā dukh hai

vahī mire be-vajūd chehre

sitāra-e-dil kī be-panāhī kā pāsbāñ hai

kuchh aur ho bhī to rā.egāñ hai

hawaen bhi

baadban bhi mere

samundaron ke sukut mein

be-libas naslon ke reza reza jamal ke sab nishan bhi mere

mere shikasta wajud ki

lahlahati faslon pe

girne wali shafiq shabnam mein ret ke aasman bhi mere

qadim lafzon ke gham mein be-jaan manzaron ke jahan bhi mere

sitara-e-dil ki wusaton mein

khile hue jangalon ke asrar saaton ke guman bhi mere

mere tasawwur ke bojh se TuTti zamin par

halak hote hue labon par wafaon ke sab nishan bhi mere

gulab-chehron pe

sabz aankhon ke manzaron mein

najat-e-gham ki shikasta KHwahish ki rakh meri bujhe hue karwan bhi mere

jo kho gae

aur jo aane wale dinon ka dukh hai

wahi mere be-wajud chehre

sitara-e-dil ki be-panahi ka pasban hai

kuchh aur ho bhi to raegan hai