kunj-e-mohabbat

ye sunsān rāteñ ye ThanDī havā.eñ ye phailī huī terī yādoñ kī ḳhushbū

ye chup-chāp se peḌ ye ġham ke saa.e ye dil kī kasak ye mohabbat kā jaadū

ye sab jāgte haiñ ye sab sochte haiñ ye sab karvaTeñ le ke haiñ aah bharte

na.ī manziloñ se na.e rāstoñ se na.e moḌ se sab ke sab haiñ guzarte

har ik moḌ par jaise koī khaḌā ho ishāroñ ishāroñ meñ kuchh kah rahā ho

samajh meñ na aa.e koī baat us kī magar jaise chashma sā ik bah rahā ho

koī jaise mīThe madhur giit ke bol maddham suroñ meñ yuñhī gungunā.e

koī jaise tūfāñ dabā.e ho dil meñ kisī se magar phir bhī kuchh kah na paa.e

kuchh alfāz aise jo yuuñ dekhne meñ purāne se haiñ aur kitne hī insāñ

inhīñ ke sahāre se kahte rahe haiñ diloñ kī murādeñ javānī ke armāñ

ye armān ye ārzūeñ hamārī ye kuchh rasmasāte hue phuul jaise

jagā.eñ jinheñ aa ke jhoñke havā ke jinheñ gudgudā jaa.eñ aa aa ke bhauñre

ḳhizāñ kī havāoñ ke chalne se pahle Tapakte hue phuul ke ras meñ Duubā

koī giit sā bun liyā hai bahāroñ ne gaate haiñ ab bhī jise bāġh-o-sahrā

jo kunj-e-mohabbat meñ peḌoñ kī chhantī huī chāñdnī kī zabāñ se hai kahtā

kaho aaj kī raat kaisī guzārī koī raat kī raat milne bhī aayā

ye sunsan raaten ye ThanDi hawaen ye phaili hui teri yaadon ki KHushbu

ye chup-chap se peD ye gham ke sae ye dil ki kasak ye mohabbat ka jadu

ye sab jagte hain ye sab sochte hain ye sab karwaTen le ke hain aah bharte

nai manzilon se nae raston se nae moD se sab ke sab hain guzarte

har ek moD par jaise koi khaDa ho ishaaron ishaaron mein kuchh kah raha ho

samajh mein na aae koi baat us ki magar jaise chashma sa ek bah raha ho

koi jaise miThe madhur git ke bol maddham suron mein yunhi gungunae

koi jaise tufan dabae ho dil mein kisi se magar phir bhi kuchh kah na pae

kuchh alfaz aise jo yun dekhne mein purane se hain aur kitne hi insan

inhin ke sahaare se kahte rahe hain dilon ki muraden jawani ke arman

ye arman ye aarzuen hamari ye kuchh rasmasate hue phul jaise

jagaen jinhen aa ke jhonke hawa ke jinhen gudguda jaen aa aa ke bhaunre

KHizan ki hawaon ke chalne se pahle Tapakte hue phul ke ras mein Duba

koi git sa bun liya hai bahaaron ne gate hain ab bhi jise bagh-o-sahra

jo kunj-e-mohabbat mein peDon ki chhanti hui chandni ki zaban se hai kahta

kaho aaj ki raat kaisi guzari koi raat ki raat milne bhi aaya