kursi

siyāsiyāt meñ ūñchā hai naam kursī kā

kiyā hai maiñ ne bahut ehtirām kursī kā

ghasīTā apnī taraf intizām kursī kā

ye merā kaam thā baaqī hai kaam kursī kā

ye gol mez se kahtī hai ab ki to kyā hai

chair ke sāmne sofe kī aabrū kyā hai

koī clerk koī manager kī kursī hai

jahāñ hai nurse vahīñ doctor kī kursī hai

jo ek Taañg kī TuuTī kamar kī kursī hai

vo mere shahr ke ik counselor kī kursī hai

briādrī kī badaulat amiin haiñ mausūf

pachās saal se kursī-nashīn haiñ mausūf

chair pe baiTh ke saare hī shaan vaale haiñ

jo par kaTe the vo ūñchī uḌaan vaale haiñ

jo be-makān the das das makān vaale haiñ

vo sirf paan nahīñ pandān vaale haiñ

ajiib rasm chalī hai ki is zamāne meñ

avaam dhuup meñ kursī hai shāmiyāne meñ

mushā.ere meñ bhī aksar uchhal ga.ī kursī

ġhazal ke chalne se pahle hī chal ga.ī kursī

har ek mez se aage nikal ga.ī kursī

badal ga.e rufaqā jab badal ga.ī kursī

harām maal se jaa.ez kamā.ī behtar hai

na.ī chair se purānī tipā.ī behtar hai

usī kā zikr basoñ meñ bhī baat baat pe hai

tamām rail meñ jhagḌā isī kī zaat pe hai

yahī savār arākīn-e-baldiyāt pe hai

isī kā hukm qalam par kabhī davāt pe hai

mushā.ere meñ bhī jhagḌā isī ibārat kā

kabhī maqām kabhī kursī-e-sadārat kā

banī thī kursī jo ik head-master ke liye

janāb-e-head use le ga.e haiñ ghar ke liye

banā diyā jinheñ kursī ne umr bhar ke liye

chair hai un ke liye vo nahīñ chair ke liye

amānatan jo chair par biThā.e jaate haiñ

vo log ḳhuud nahīñ uThte uThā.e jaate haiñ

kuchh is adā se ye dilkash sifāt chaltī hai

kisī ra.iis kī goyā barāt chaltī hai

jahāñ bhī jaao yahī saath saath chaltī hai

chipak ke jaise sharīk-e-hayāt chaltī hai

ye zā.iqa bhī ajab hai ki chakh nahīñ sakte

ham is kī god meñ tashrīf rakh nahīñ sakte

siyasiyat mein uncha hai nam kursi ka

kiya hai main ne bahut ehtiram kursi ka

ghasiTa apni taraf intizam kursi ka

ye mera kaam tha baqi hai kaam kursi ka

ye gol mez se kahti hai ab ki to kya hai

chair ke samne sofe ki aabru kya hai

koi clerk koi manager ki kursi hai

jahan hai nurse wahin doctor ki kursi hai

jo ek Tang ki TuTi kamar ki kursi hai

wo mere shahr ke ek counselor ki kursi hai

briadri ki badaulat amin hain mausuf

pachas sal se kursi-nashin hain mausuf

chair pe baiTh ke sare hi shan wale hain

jo par kaTe the wo unchi uDan wale hain

jo be-makan the das das makan wale hain

wo sirf pan nahin pandan wale hain

ajib rasm chali hai ki is zamane mein

awam dhup mein kursi hai shamiyane mein

mushaere mein bhi aksar uchhal gai kursi

ghazal ke chalne se pahle hi chal gai kursi

har ek mez se aage nikal gai kursi

badal gae rufaqa jab badal gai kursi

haram mal se jaez kamai behtar hai

nai chair se purani tipai behtar hai

usi ka zikr bason mein bhi baat baat pe hai

tamam rail mein jhagDa isi ki zat pe hai

yahi sawar arakin-e-baldiyat pe hai

isi ka hukm qalam par kabhi dawat pe hai

mushaere mein bhi jhagDa isi ibarat ka

kabhi maqam kabhi kursi-e-sadarat ka

bani thi kursi jo ek head-master ke liye

janab-e-head use le gae hain ghar ke liye

bana diya jinhen kursi ne umr bhar ke liye

chair hai un ke liye wo nahin chair ke liye

amanatan jo chair par biThae jate hain

wo log KHud nahin uThte uThae jate hain

kuchh is ada se ye dilkash sifat chalti hai

kisi rais ki goya baraat chalti hai

jahan bhi jao yahi sath sath chalti hai

chipak ke jaise sharik-e-hayat chalti hai

ye zaiqa bhi ajab hai ki chakh nahin sakte

hum is ki god mein tashrif rakh nahin sakte