kutton ka nauha

purānī baat hai

lekin ye anhonī sī lagtī hai

banī-quddūs ke beToñ kā

ye dastūr thā

vo apnī shamshīreñ

niyāmoñ meñ na rakhte the

musallah ho ke sote the

aur un ke ḳhūb-rū gabrū

kase tīroñ kī sūrat

rāt-bhar

mish.al-ba-kaf

ḳhemoñ ke bāhar jāgte rahte

banī-quddūs ke beTe

balāoñ aur azāboñ ko

hamesha laġhzish-e-pā kā sila ginte

gunāhoñ se hazar karte

magar ik din

ki vo manhūs saa.at thī ḳharābī kī

zanān-e-nīm-uryāñ dekh kar ḳhāna-ba-doshoñ kī

kuchh aise mar-miTe

jab raat aa.ī to

banī-quddūs ke beToñ kī shamshīreñ

niyāmoñ meñ paḌī thiiñ

aur dīvāroñ pe laTkī thiiñ

vo pahlī raat thī

ḳhemoñ ke bāhar ghup-añdherā thā

fazā meñ duur tak

kuttoñ kī āvāzoñ kā nauha thā

purani baat hai

lekin ye anhoni si lagti hai

bani-quddus ke beTon ka

ye dastur tha

wo apni shamshiren

niyamon mein na rakhte the

musallah ho ke sote the

aur un ke KHub-ru gabru

kase tiron ki surat

raat-bhar

mishal-ba-kaf

KHemon ke bahar jagte rahte

bani-quddus ke beTe

balaon aur azabon ko

hamesha laghzish-e-pa ka sila ginte

gunahon se hazar karte

magar ek din

ki wo manhus saat thi KHarabi ki

zanan-e-nim-uryan dekh kar KHana-ba-doshon ki

kuchh aise mar-miTe

jab raat aai to

bani-quddus ke beTon ki shamshiren

niyamon mein paDi thin

aur diwaron pe laTki thin

wo pahli raat thi

KHemon ke bahar ghup-andhera tha

faza mein dur tak

kutton ki aawazon ka nauha tha