kufa-mizaj

ruko mohabbat ke ḳhānvāde ke shāhzāde

ruko kahāñ ujlatoñ meñ jāneñ luTā rahe ho

kahāñ lahū se charāġh raushan kiye khaḌe ho

ye kaise logoñ se ‘ahd-e-ulfat nibhā rahe ho

ye log vo haiñ jo tere zaḳhmoñ ko ghaav kar ke

havā.eñ deñge sharar ko ḳhud hī alaav kar ke

tirī vafā kā junūñ salāmat ho tā-qayāmat

ye log lekin vafā.eñ becheñge bhaav kar ke

suno mohabbat ke ḳhānvāde ke shāhzāde

ye dhyān rakhnā ki tum se pahle hameñ junūñ thā

hameñ junūñ thā ki is qabīle meñ jaañ luTā.eñ

hameñ junūñ thā ki vahshatoñ se sukūñ banā.eñ

vo ham the sahrā ko jo samundar banā rahe the

vo ham the jo pattharoñ ko dhaḌkan sikhā rahe the

magar ye kūfa-mizāj logoñ kī 'ādateñ haiñ

imaam un kī vafā kī ḳhātir 'alam uThā.e

imaam apne lahū se sahrā meñ rang laa.e

to ye qabīla yazīd kī saf meñ jā rukegā

tumhī ġhalat the tumhī ġhalat ho tumheñ kahegā

suno mohabbat ke ḳhānvāde ke shāhzāde

ye bevafā.ī kā silsila hai nahīñ rukegā

ruko mohabbat ke KHanwade ke shahzade

ruko kahan ujlaton mein jaanen luTa rahe ho

kahan lahu se charagh raushan kiye khaDe ho

ye kaise logon se ‘ahd-e-ulfat nibha rahe ho

ye log wo hain jo tere zaKHmon ko ghaw kar ke

hawaen denge sharar ko KHud hi alaw kar ke

teri wafa ka junun salamat ho ta-qayamat

ye log lekin wafaen bechenge bhaw kar ke

suno mohabbat ke KHanwade ke shahzade

ye dhyan rakhna ki tum se pahle hamein junun tha

hamein junun tha ki is qabile mein jaan luTaen

hamein junun tha ki wahshaton se sukun banaen

wo hum the sahra ko jo samundar bana rahe the

wo hum the jo pattharon ko dhaDkan sikha rahe the

magar ye kufa-mizaj logon ki 'adaten hain

imam un ki wafa ki KHatir 'alam uThae

imam apne lahu se sahra mein rang lae

to ye qabila yazid ki saf mein ja rukega

tumhi ghalat the tumhi ghalat ho tumhein kahega

suno mohabbat ke KHanwade ke shahzade

ye bewafai ka silsila hai nahin rukega