kya karun

phir dil meñ dard silsila-e-jumbā hai kyā karūñ

phir ashk garm-e-dāvat-e-mizhgāñ hai kyā karūñ

phir chaak chaak siina hai āvāz duuñ kise

phir taar taar jaib-o-garebāñ hai kyā karūñ

phir ittisāl-e-gardan-o-ḳhanjar hai kyā kahūñ

phir iḳhtilāt-e-zaḳhm-o-namak-dāñ hai kyā karūñ

phir ik girah harīf-e-nafas hai kise batā.ūñ

phir ik khaTak rafīqe-e-rag-e-jāñ hai kyā karūñ

siine meñ ek dashna sā letā hai karvaTeñ

rag rag meñ ek aag sī ġhaltāñ hai kyā karūñ

jis chiiz par madār thā darmān-e-zīst kā

vo shai phir aaj dard kā unvāñ hai kyā karūñ

phir sar par abr-e-daur-e-junūñ hai ghirā huā

phir dil meñ bū-e-zulf pareshāñ hai kyā karūñ

phir ishq-e-nā-subūr kā partav hai ruuh par

phir dil huzūr-e-aql pashemāñ hai kyā karūñ

biite dinoñ kī yaad par afshāñ hai kyā karūñ

rātoñ kī nam havāoñ meñ tāroñ kī chhāñv meñ

biite dinoñ kī yaad par-afshāñ hai kyā karūñ

jis chāñdnī ko kho.e hue muddateñ huiiñ

phir zehn ke ufuq se numāyāñ hai kyā karūñ

taqdīr ne kabhī jo nikālā thā ik julūs

phir jāda-e-nafas pe ḳhirāmāñ hai kyā karūñ

vo ġham ki de chukā huuñ jise bār-hā shikast

phir dil se 'josh' dast-o-garebāñ hai kyā karūñ

phir dil mein dard silsila-e-jumba hai kya karun

phir ashk garm-e-dawat-e-mizhgan hai kya karun

phir chaak chaak sina hai aawaz dun kise

phir tar tar jaib-o-gareban hai kya karun

phir ittisal-e-gardan-o-KHanjar hai kya kahun

phir iKHtilat-e-zaKHm-o-namak-dan hai kya karun

phir ek girah harif-e-nafas hai kise bataun

phir ek khaTak rafiqe-e-rag-e-jaan hai kya karun

sine mein ek dashna sa leta hai karwaTen

rag rag mein ek aag si ghaltan hai kya karun

jis chiz par madar tha darman-e-zist ka

wo shai phir aaj dard ka unwan hai kya karun

phir sar par abr-e-daur-e-junun hai ghira hua

phir dil mein bu-e-zulf pareshan hai kya karun

phir ishq-e-na-subur ka partaw hai ruh par

phir dil huzur-e-aql pasheman hai kya karun

bite dinon ki yaad par afshan hai kya karun

raaton ki nam hawaon mein taron ki chhanw mein

bite dinon ki yaad par-afshan hai kya karun

jis chandni ko khoe hue muddaten huin

phir zehn ke ufuq se numayan hai kya karun

taqdir ne kabhi jo nikala tha ek julus

phir jada-e-nafas pe KHiraman hai kya karun

wo gham ki de chuka hun jise bar-ha shikast

phir dil se 'josh' dast-o-gareban hai kya karun