kyon jalwon ke mahtab bujhe

vo husn jo ḳhanda-zan thā kabhī mahtāb kī ujlī kirnoñ par

vo gaal jinhoñ ne sharmāyā shādāb kañval ke phūloñ ko

vo aañkh chhalaktī rahtī thī paimāne se jis kī bad-mastī

vo husn hai kyoñ māyūs-e-nazar kyoñ jalvoñ ke mahtāb bujhe

kyoñ gul huiiñ nazroñ kī sham.eñ kyoñ ashk haiñ palkoñ par larzāñ

murjhā ga.e kyoñ aariz ke kañval gahnā ga.e kyoñ raushan taare

vo ek adā jis ne dil ko baḳhshī thī tamanna jiine kī

vo ek tabassum jis ne kabhī luuTā thā suhāg armānoñ kā

vo ek nazar vo bijlī jis ne phūñkā ziist ke ḳhirman ko

mahrūm-e-nigāh-e-shauq huī kyoñ shoḳh adāoñ kī pūñjī

barbād-e-ḳhizāñ haiñ ab kaise rangīn tabassum kī galiyāñ

vo ek nazar afsurda kyoñ vo ek nazar hai hairāñ kyoñ

wo husn jo KHanda-zan tha kabhi mahtab ki ujli kirnon par

wo gal jinhon ne sharmaya shadab kanwal ke phulon ko

wo aankh chhalakti rahti thi paimane se jis ki bad-masti

wo husn hai kyon mayus-e-nazar kyon jalwon ke mahtab bujhe

kyon gul huin nazron ki shamen kyon ashk hain palkon par larzan

murjha gae kyon aariz ke kanwal gahna gae kyon raushan tare

wo ek ada jis ne dil ko baKHshi thi tamanna jine ki

wo ek tabassum jis ne kabhi luTa tha suhag armanon ka

wo ek nazar wo bijli jis ne phunka zist ke KHirman ko

mahrum-e-nigah-e-shauq hui kyon shoKH adaon ki punji

barbaad-e-KHizan hain ab kaise rangin tabassum ki galiyan

wo ek nazar afsurda kyon wo ek nazar hai hairan kyon