la-hasil

malgaje se dhuñdalke meñ jab tum university se

lauT rahe hote ho

vahīñ campus ke bāhar

maiñ bhī to baiThī hotī huuñ

kabhī na ḳhatm hone vaale intizār meñ

maiñ tumheñ dekh rahī hotī huuñ

aur tum

paas se aise guzar jaate ho

jaise vāqif hī na ho

maiñ vahīñ dahlīz pe baiThī rah jaatī huuñ

phir pul ke paas se jab tum guzarte hue

Dūbte sūraj ko ek nazar dekhte ho

duur kahīñ us Dūbte sūraj kī surḳh tāñbe aisī raushnī se tumhārī dahaktī jabīñ par

jab darāḌeñ paḌne lagtī haiñ

maiñ tab bhī tumheñ dekh rahī hotī huuñ

galī kā bulb raushan karte hue

ek pal ke liye soch meñ paḌ jaatī huuñ

ab bhalā mere liye mann-o-salvā kyoñ utarne lagā

maiñ darvāza khole zindagī kā intizār kartī huuñ

magar vo mere haath nahīñ aatī

malgaje se dhundalke mein jab tum uniwersity se

lauT rahe hote ho

wahin campus ke bahar

main bhi to baiThi hoti hun

kabhi na KHatm hone wale intizar mein

main tumhein dekh rahi hoti hun

aur tum

pas se aise guzar jate ho

jaise waqif hi na ho

main wahin dahliz pe baiThi rah jati hun

phir pul ke pas se jab tum guzarte hue

Dubte suraj ko ek nazar dekhte ho

dur kahin us Dubte suraj ki surKH tanbe aisi raushni se tumhaari dahakti jabin par

jab daraDen paDne lagti hain

main tab bhi tumhein dekh rahi hoti hun

gali ka bulb raushan karte hue

ek pal ke liye soch mein paD jati hun

ab bhala mere liye mann-o-salwa kyon utarne laga

main darwaza khole zindagi ka intizar karti hun

magar wo mere hath nahin aati