lafz

lafz bahut chhoTe hote haiñ

lekin un se ik aisā nanhā-munnā sā ghar to banāyā jā saktā hai

jo ham donoñ ke basne ko kaafī ho

lafz bahut bikhre hote haiñ

lekin un ko joḌ ke ek khilaunā to ban saktā hai

jo ik bhūke bachche ko bahlā hī sake

lafz bahut thoḌe hote haiñ

lekin un ko joḌ baTor ke

ik aisī chhoTī sī arāzī to ḳharīdī jā saktī hai

jis meñ sunahrī ḳhvāb hī kāsht kiye jaa.eñ

lafz bahut mahñge hote haiñ

lekin un ko kāT-kūT kar qistoñ par ik baajā to aa saktā hai

lafz to bā-barkat hote haiñ

dargāhoñ kī shāmoñ jaise

mallāhoñ ke gītoñ jaise

dahqānoñ ke hāthoñ jaise

maañ kī nek du'āoñ jaise

bachchoñ kī āvāzoñ jaise

lafz bahut chhoTe hote hain

lekin un se ek aisa nanha-munna sa ghar to banaya ja sakta hai

jo hum donon ke basne ko kafi ho

lafz bahut bikhre hote hain

lekin un ko joD ke ek khilauna to ban sakta hai

jo ek bhuke bachche ko bahla hi sake

lafz bahut thoDe hote hain

lekin un ko joD baTor ke

ek aisi chhoTi si araazi to KHaridi ja sakti hai

jis mein sunahri KHwab hi kasht kiye jaen

lafz bahut mahnge hote hain

lekin un ko kaT-kuT kar qiston par ek baja to aa sakta hai

lafz to ba-barkat hote hain

dargahon ki shamon jaise

mallahon ke giton jaise

dahqanon ke hathon jaise

man ki nek du'aon jaise

bachchon ki aawazon jaise