lafz

lafz taqdīr mirī

husn bhī lafz meñ hai

ishq bhī lafz meñ hai

adl bhī lafz meñ hai

lafz meñ sāz-e-azal

lafz meñ rāz-e-abad

lafz māmūra-e-ḳhushbū

lafz ik qaus-e-quzah

lafz bādal kā ḳhirām

lafz dariyā kī ravānī

lafz meñ rif.at-e-koh

lafz meñ vus.at-e-sahrā

lafz miTTī kā numū

lafz meñ chāñd kā mehvar

lafz meñ matl.a-e-ḳhurshīd-e-daraḳhshāñ

lafz nairañg-e-ayyām kī dhaḌkan

lafz hairat-kada-e-kaun-o-makāñ

lafz meñ vaqt kī raftār kī chaap

jism kā ramz shanāsā bhī hai lafz

lafz meñ aañkh kā nuur

lafz āvāz kā ruup

lafz hī zulf-e-dotā

lafz hī rū-e-munavvar

lafz shīrīnī-e-lab

lafz andāz-e-junūñ

lafz hī ruuh kā dāna-e-subul

lafz hai us kā jamāl

lafz hai us kā jalāl

lafz maujūd bhī hai ġhaib bhī hai

lafz hai hāmil-e-asrār-o-rumūz

lafz namrūd kī ātish meñ gul-afshāñ

lafz se vādī-e-sīnā bhī huī buq.a-e-nūr

yad-e-baizā bhī hai lafz

dam-e-īsā bhī hai lafz

lafz hī shaqq-e-qamar

lafz burrāq hai me.arāj kī shab

lafz hī rūh-e-amīñ

2

maiñ bhī ik lafz hī thā

magar ab bikhrā huā harfoñ meñ

harf-e-zulmāt meñ mahsūr hue

muntazir huuñ

dam-e-īsā

yad-e-baizā

in ko phir lafz banā de

lafz taqdir meri

husn bhi lafz mein hai

ishq bhi lafz mein hai

adl bhi lafz mein hai

lafz mein saz-e-azal

lafz mein raaz-e-abad

lafz mamura-e-KHushbu

lafz ek qaus-e-quzah

lafz baadal ka KHiram

lafz dariya ki rawani

lafz mein rifat-e-koh

lafz mein wusat-e-sahra

lafz miTTi ka numu

lafz mein chand ka mehwar

lafz mein matla-e-KHurshid-e-daraKHshan

lafz nairang-e-ayyam ki dhaDkan

lafz hairat-kada-e-kaun-o-makan

lafz mein waqt ki raftar ki chap

jism ka ramz shanasa bhi hai lafz

lafz mein aankh ka nur

lafz aawaz ka rup

lafz hi zulf-e-dota

lafz hi ru-e-munawwar

lafz shirini-e-lab

lafz andaz-e-junun

lafz hi ruh ka dana-e-subul

lafz hai us ka jamal

lafz hai us ka jalal

lafz maujud bhi hai ghaib bhi hai

lafz hai hamil-e-asrar-o-rumuz

lafz namrud ki aatish mein gul-afshan

lafz se wadi-e-sina bhi hui buqa-e-nur

yad-e-baiza bhi hai lafz

dam-e-isa bhi hai lafz

lafz hi shaqq-e-qamar

lafz burraq hai mearaj ki shab

lafz hi ruh-e-amin

2

main bhi ek lafz hi tha

magar ab bikhra hua harfon mein

harf-e-zulmat mein mahsur hue

muntazir hun

dam-e-isa

yad-e-baiza

in ko phir lafz bana de