lafz to banjh hain

lafz to bāñjh haiñ jazboñ kī qadr kyā jāneñ

zindagī baar chuke hoñ to qahr kyā jāneñ

apne ma.asūm gulāboñ se hasīñ bachchoñ kī

ek khoī huī muskān pe kuchh likhnā hai

un kī be-jān nigāhoñ pe mujhe kahnā hai

lafz to bāñjh haiñ qirtās ke ā.īne haiñ

lafz ziist kā unvān haiñ sarmāya haiñ

phir bhī jazbāt ke akkās nahīñ ho sakte

ḳhauf ke shahr meñ ehsās nahīñ ho sakte

nauha-e-ġham bhī to ehsās kī jaulānī hai

haa.e ai dil ki yahāñ ḳhauf kī vīrānī hai

muntazir maañ jo khaḌī hai ki bahut der huī

mere ghar-bār kī raunaq nahīñ aayā ab tak

lafz meñ DhūñD rahī huuñ ki use kaise kahūñ

terā ma.asūm shahīdoñ meñ likhā aayā

naam apnā jo bahut pyaar se rakhā tū ne

TuuT kar duur kahīñ jā ke ki girā hai vo shajar

jis ko din-rāt mohabbat se sañvārā tū ne

lafz to bāñjh haiñ jazbāt nahīñ kah sakte

vaqt ke vaar ko us paar nahīñ sah sakte

lafz to banjh hain jazbon ki qadr kya jaanen

zindagi bar chuke hon to qahr kya jaanen

apne masum gulabon se hasin bachchon ki

ek khoi hui muskan pe kuchh likhna hai

un ki be-jaan nigahon pe mujhe kahna hai

lafz to banjh hain qirtas ke aaine hain

lafz zist ka unwan hain sarmaya hain

phir bhi jazbaat ke akkas nahin ho sakte

KHauf ke shahr mein ehsas nahin ho sakte

nauha-e-gham bhi to ehsas ki jaulani hai

hae ai dil ki yahan KHauf ki virani hai

muntazir man jo khaDi hai ki bahut der hui

mere ghar-bar ki raunaq nahin aaya ab tak

lafz mein DhunD rahi hun ki use kaise kahun

tera masum shahidon mein likha aaya

nam apna jo bahut pyar se rakha tu ne

TuT kar dur kahin ja ke ki gira hai wo shajar

jis ko din-raat mohabbat se sanwara tu ne

lafz to banjh hain jazbaat nahin kah sakte

waqt ke war ko us par nahin sah sakte