lahu ka Tika

ye ūñch-nīch ye nafrat ye jehl ye iflās

zamīñ pe kis ne lagā.e ye zahr ke paude

ki jin ke saa.e meñ insāniyat sisaktī hai

ki jin kī chhāñv meñ hote haiñ maut ke saude

fareb-o-kizb ke sar par hai tāj-e-zar-afshāñ

sadāqatoñ kī jabīñ par lahū kā Tiikā hai

pinhā ke zulm ko kis ne labāda-e-taqdīs

guloñ ke naam pe sadiyoñ chaman ko luuTā hai

sanā-e-jabr-o-sitam hai adab kā shah-pāra

ḳhulūs-e-fikr-o-nazar aib hai fasāne meñ

haqīqatoñ kā bayāñ hai baġhāvat-e-ehsās

usuul sab se baḌā jurm hai zamāne meñ

shikast-e-dil ko samajhte haiñ ishq kī azmat

in āñsūoñ se charāġhoñ kā kaam lete haiñ

dukhoñ ke shahr meñ be-kaif sī hañsī ke liye

ham apne zehn ko pahroñ fareb dete haiñ

bhaTakte rahte haiñ ehsās ke bayābāñ meñ

zamīr-e-fan ko siyah naag Daste rahte haiñ

nazar se ahl-e-zamāna kī ho ke poshīda

ham apnī fikr ke sho.aloñ meñ aap jalte haiñ

ye unch-nich ye nafrat ye jehl ye iflas

zamin pe kis ne lagae ye zahr ke paude

ki jin ke sae mein insaniyat sisakti hai

ki jin ki chhanw mein hote hain maut ke saude

fareb-o-kizb ke sar par hai taj-e-zar-afshan

sadaqaton ki jabin par lahu ka Tika hai

pinha ke zulm ko kis ne labaada-e-taqdis

gulon ke nam pe sadiyon chaman ko luTa hai

sana-e-jabr-o-sitam hai adab ka shah-para

KHulus-e-fikr-o-nazar aib hai fasane mein

haqiqaton ka bayan hai baghawat-e-ehsas

usul sab se baDa jurm hai zamane mein

shikast-e-dil ko samajhte hain ishq ki azmat

in aansuon se charaghon ka kaam lete hain

dukhon ke shahr mein be-kaif si hansi ke liye

hum apne zehn ko pahron fareb dete hain

bhaTakte rahte hain ehsas ke bayaban mein

zamir-e-fan ko siyah nag Daste rahte hain

nazar se ahl-e-zamana ki ho ke poshida

hum apni fikr ke shoalon mein aap jalte hain