lakiren

duniyā ke bakheḌoñ se ulajhte hue kal achānak

merī nazar paḌī to dekhā ki

zindagī kī hathelī se saarī lakīreñ ġhā.eb ho ga.ī haiñ

sivā.e ek lakīr ke

na chhoTī lakīreñ na baḌī

na maddham na gahrī

na mudavvar aur na mustaqīm

na donoñ hatheliyoñ ko joḌ kar bantā koī chāñd

na un lakīroñ kī oT se jhāñktā kisī sohnī kā chehra

aur na hī un meñ ulajhtā kisī mahīvāl kā dil

ye kaisī hathelī hai

bilkul sapāT

be-rang

titliyoñ kā koī rang nahīñ in pe

aur yak-laḳht

maiñ ne dekhā ki hathelī ke sahrā meñ khaḌī 'umr kī tanhā lakīr bhī miTtī jā rahī thī

aur zindagī

zindagī ke udaas chehre pe maiñ ne amaltās kī zardī utarte dekhī

nā-karda jurm ke bojh tale sar jhukā.e nazreñ churātī huī

dabe paañv khisakne kī tayyārī kartī huī

us kī āñkhoñ kī chamak lamha-ba-lamha phīkī paḌtī jā rahī thī

aur tab maiñ ne saarī quvvateñ jam' kar ke black marker uThāyā

aur zindagī kī ḳhālī hathelī pe aaḌī tirchhī be-Dhangī lekin bā-ma.anī aur pakkī lakīreñ khīñchne kī Thaan lī

duniya ke bakheDon se ulajhte hue kal achanak

meri nazar paDi to dekha ki

zindagi ki hatheli se sari lakiren ghaeb ho gai hain

siwae ek lakir ke

na chhoTi lakiren na baDi

na maddham na gahri

na mudawwar aur na mustaqim

na donon hatheliyon ko joD kar banta koi chand

na un lakiron ki oT se jhankta kisi sohni ka chehra

aur na hi un mein ulajhta kisi mahiwal ka dil

ye kaisi hatheli hai

bilkul sapaT

be-rang

titliyon ka koi rang nahin in pe

aur yak-laKHt

main ne dekha ki hatheli ke sahra mein khaDi 'umr ki tanha lakir bhi miTti ja rahi thi

aur zindagi

zindagi ke udas chehre pe main ne amaltas ki zardi utarte dekhi

na-karda jurm ke bojh tale sar jhukae nazren churaati hui

dabe panw khisakne ki tayyari karti hui

us ki aankhon ki chamak lamha-ba-lamha phiki paDti ja rahi thi

aur tab main ne sari quwwaten jam' kar ke black marker uThaya

aur zindagi ki KHali hatheli pe aaDi tirchhi be-Dhangi lekin ba-mani aur pakki lakiren khinchne ki Than li