lashkar-e-hind

jaao ai nāz-e-vatan dhaak biThā kar aanā

'azmat-e-qaum pe ḳhuun apnā bahā kar aanā

gard kī tarh se aa'dā ko uḌā kar aanā

naqsh-e-bātil ko himāla se miTā kar aanā

arjun-o-bhīm kā duniyā meñ amar naam rahe

hamla dushman kā har ik tarh se nākām rahe

uTTho is tarh ki maidāñ meñ balī uThte haiñ

amn kā le ke vo 'unvān-e-jalī uThte haiñ

haq-parastī ke liye jaise valī uThte haiñ

hifz-e-dīñ ke liye farzand-e-'alī uThte haiñ

kaañp uTThe saf-e-dushman ki jarī aate haiñ

saf-shikan paikar-e-āshufta-sarī aate haiñ

baḌhte hī jaao sadā gang-o-jaman ke mānind

jast dushman pe karo sher-figan ke mānind

arz-e-kailāsh pe chhā jaao gagan ke mānind

chiir do barf ke tūdoñ ko kiran ke mānind

chiin ke hamla-e-nāpāk ko darham kar do

saf-e-afvāj-e-'adū toḌ do barham kar do

chiir kar sīnā-e-saffāk fanā kar denā

toḌ kar tum sar-e-dushman bhī judā kar denā

ḳhatm tausī'-pasandoñ kī jafā kar denā

hind ke naam ko raushan ba-ḳhudā kar denā

ḳhatm duniyā se hamesha ko tashaddud ho jaa.e

hashr tak ke liye sab duur taraddud ho jaa.e

kaun sho'le liye nazdīk-e-chaman aayā hai

niyyat-e-jang liye samt-e-vatan aayā hai

kaun bad-'ahd sū-e-gang-o-jaman aayā hai

ḳhūn-e-iḳhlās liye 'ahd-shikan aayā hai

zindagī jis kī chahetī ho vo pīchhe haT jaa.e

jis ko marne kī havas ho vo kafan le aa.e

jao ai naz-e-watan dhak biTha kar aana

'azmat-e-qaum pe KHun apna baha kar aana

gard ki tarh se aa'da ko uDa kar aana

naqsh-e-baatil ko himala se miTa kar aana

arjun-o-bhim ka duniya mein amar nam rahe

hamla dushman ka har ek tarh se nakaam rahe

uTTho is tarh ki maidan mein bali uThte hain

amn ka le ke wo 'unwan-e-jali uThte hain

haq-parasti ke liye jaise wali uThte hain

hifz-e-din ke liye farzand-e-'ali uThte hain

kanp uTThe saf-e-dushman ki jari aate hain

saf-shikan paikar-e-ashufta-sari aate hain

baDhte hi jao sada gang-o-jaman ke manind

jast dushman pe karo sher-figan ke manind

arz-e-kailash pe chha jao gagan ke manind

chir do barf ke tudon ko kiran ke manind

chin ke hamla-e-napak ko darham kar do

saf-e-afwaj-e-'adu toD do barham kar do

chir kar sina-e-saffak fana kar dena

toD kar tum sar-e-dushman bhi juda kar dena

KHatm tausi'-pasandon ki jafa kar dena

hind ke nam ko raushan ba-KHuda kar dena

KHatm duniya se hamesha ko tashaddud ho jae

hashr tak ke liye sab dur taraddud ho jae

kaun sho'le liye nazdik-e-chaman aaya hai

niyyat-e-jang liye samt-e-watan aaya hai

kaun bad-'ahd su-e-gang-o-jaman aaya hai

KHun-e-iKHlas liye 'ahd-shikan aaya hai

zindagi jis ki chaheti ho wo pichhe haT jae

jis ko marne ki hawas ho wo kafan le aae