lauh-e-mahfuz

mohalle kā jo rakhvālā thā

us ne ādatan lāThī bajā kar

balġhamī āvāz se na.ara lagāyā

jāgte rahnā

mire aḳhbār vaale ne idhar

ma.amūl se haT kar

mujhe āvāz de kar roz kā aḳhbār Daalā

yahī kuchh duudh vaale ne kiyā

aur pherī vaale ne maiñ sau kar sub.h jab uThā to un ma.asūm logoñ ne

ishāroñ aur kināyoñ se mujhe chāhā batānā aur samjhānā jo shāyad ik zamāne ko patā thā mā-sivā mere

ki mere naam kī taḳhtī se

merā naam ġhā.eb hai

ba-zāhir faisla saa.ib hai

in taaza ḳhudāoñ kā hamāre nā-ḳhudāoñ kā

magar ye bhī unheñ ma.alūm to hogā

jo ḳhāliq hai zamīn-o-āsmāñ kā

vo jo mālik hai

raqam taqdīr kartā hai

vahī tahrīr kartā hai

nahīñ mumkin miTānā

merī jaisī ājiz-o-majbūr hastī ke liye jo kuchh bhī vo tahrīr kartā hai

jo vo taqdīr kartā hai

yaqīñ merā

mirā īmān hai us par

ki merī lauh par sab kuchh

usī tarah se kanda hai

mire ḳhāliq ne mere naam ko

kal kī tarah se

aaj bhī mahfūz rakkhā hai

vo mere naam ko

kal bhī yūñhī mahfūz rakkhegā

mohalle ka jo rakhwala tha

us ne aadatan laThi baja kar

balghami aawaz se nara lagaya

jagte rahna

mere aKHbar wale ne idhar

mamul se haT kar

mujhe aawaz de kar roz ka aKHbar Dala

yahi kuchh dudh wale ne kiya

aur pheri wale ne main sau kar subh jab uTha to un masum logon ne

ishaaron aur kinayon se mujhe chaha batana aur samjhana jo shayad ek zamane ko pata tha ma-siwa mere

ki mere nam ki taKHti se

mera nam ghaeb hai

ba-zahir faisla saib hai

in taza KHudaon ka hamare na-KHudaon ka

magar ye bhi unhen malum to hoga

jo KHaliq hai zamin-o-asman ka

wo jo malik hai

raqam taqdir karta hai

wahi tahrir karta hai

nahin mumkin miTana

meri jaisi aajiz-o-majbur hasti ke liye jo kuchh bhi wo tahrir karta hai

jo wo taqdir karta hai

yaqin mera

mera iman hai us par

ki meri lauh par sab kuchh

usi tarah se kanda hai

mere KHaliq ne mere nam ko

kal ki tarah se

aaj bhi mahfuz rakkha hai

wo mere nam ko

kal bhi yunhi mahfuz rakkhega