lohe ke jabDe

tumheñ yaad hogā

tum ne mujhe pichhle baras ḳhat meñ april bhejā

jo mujh tak pahuñchte pahuñchte august ho gayā

lafz piile pattoñ kī tarah

farsh par bikhar ga.e

december kī sard rātoñ meñ

maiñ va.adoñ ke ātish-dān par

baiThī jāgtī rahī

merī ragoñ meñ jamā huā december

āñkhoñ se pighal kar

bahtā rahtā hai

is baras mujhe

ḳhat meñ kuchh nahīñ bhejnā

kuchh bhī nahīñ

shāyad aziyyatoñ se bharī

shāḳhoñ par

kisī va.ade kī koñpal

phuuT paḌe

mausamoñ kā kyā hai kab badal jaa.eñ

be-e'tibār lahjoñ kī tarah

vaqt sab kuchh ulaT palaT rahā hai

shāyad tumhāre lauTne tak

bahut kuchh vaisā na rahe

jaisā tum chhoḌ ga.e the

lohe ke jabḌe

miTTī ke malbūs

ko tār-tār karte jā rahe haiñ

pul jahāñ se tum park ke kināre

khaḌe dikhā.ī dete the

vo manzar metro bas ne nigal liyā hai

sumbul ke peḌoñ kī jagah shopping mall le chukā hai

aur haañ

vo phūloñ vaalī dukān

jahāñ se ham buke lete the

vahāñ fast-fōd ban gayā

dil kī jagah añtaḌiyoñ ne le lī hai

kyā kuchh aur kaise badal jaatā hai

tumhein yaad hoga

tum ne mujhe pichhle baras KHat mein april bheja

jo mujh tak pahunchte pahunchte august ho gaya

lafz pile patton ki tarah

farsh par bikhar gae

december ki sard raaton mein

main wadon ke aatish-dan par

baiThi jagti rahi

meri ragon mein jama hua december

aankhon se pighal kar

bahta rahta hai

is baras mujhe

KHat mein kuchh nahin bhejna

kuchh bhi nahin

shayad aziyyaton se bhari

shaKHon par

kisi wade ki konpal

phuT paDe

mausamon ka kya hai kab badal jaen

be-e'tibar lahjon ki tarah

waqt sab kuchh ulaT palaT raha hai

shayad tumhaare lauTne tak

bahut kuchh waisa na rahe

jaisa tum chhoD gae the

lohe ke jabDe

miTTi ke malbus

ko tar-tar karte ja rahe hain

pul jahan se tum park ke kinare

khaDe dikhai dete the

wo manzar metro bas ne nigal liya hai

sumbul ke peDon ki jagah shopping mall le chuka hai

aur han

wo phulon wali dukan

jahan se hum buke lete the

wahan fast-food ban gaya

dil ki jagah antaDiyon ne le li hai

kya kuchh aur kaise badal jata hai