luDhakta patthar

raushnī Duub ga.ī chāñd ne muñh Dhāñp liyā

ab koī raah dikhā.ī nahīñ detī mujh ko

mere ehsās meñ kohrām machā hai lekin

koī āvāz sunā.ī nahīñ detī mujh ko

raat ke haath ne kirnoñ kā galā ghūñT diyā

jaise ho jaa.e zamīñ-bos shivāla koī

ye ghaTā-Top añdherā ye ghanā sannāTā

ab koī giit hai baaqī na ujālā koī

jis ne chhup-chhup ke jalāyā mirī ummīdoñ ko

vo sulagtī huī ThanDak mire ghar tak pahuñchī

dekhte dekhte sailāb-e-havas phail gayā

mauj-e-pāyāb ubhar kar mire sar tak pahuñchī

mire tārīk gharauñde ko udāsī de kar

muskurāte haiñ darīchoñ meñ ishāre kyā kyā

uf ye ummīd kā madfan ye mohabbat kā mazār

is meñ dekhe haiñ tabāhī ke nazāre kyā kyā

jis ne ā.ankhoñ meñ sitāre se kabhī ghole the

aaj ehsās pe kājal sā bikherā us ne

jis ne ḳhud aa ke TaTolā thā mire siine ko

le liyā ġhair ke pahlū meñ baserā us ne

vo talavvun ki nahīñ jis kā Thikāna koī

us ke andāz-e-kuhan aaj na.e taur ke haiñ

vahī bebāk ishāre vahī bhaḌke hue giit

kal mire haath bike aaj kisī aur ke haiñ

vo mahaktā sā chahaktā sā ubaltā siina

us kī mī.ād hai do roz lipaTne ke liye

zulf bikhrī huī bikhrī to nahīñ rah saktī

phailtā hai koī saaya to simaTne ke liye

raushni Dub gai chand ne munh Dhanp liya

ab koi rah dikhai nahin deti mujh ko

mere ehsas mein kohram macha hai lekin

koi aawaz sunai nahin deti mujh ko

raat ke hath ne kirnon ka gala ghunT diya

jaise ho jae zamin-bos shiwala koi

ye ghaTa-Top andhera ye ghana sannaTa

ab koi git hai baqi na ujala koi

jis ne chhup-chhup ke jalaya meri ummidon ko

wo sulagti hui ThanDak mere ghar tak pahunchi

dekhte dekhte sailab-e-hawas phail gaya

mauj-e-payab ubhar kar mere sar tak pahunchi

mere tarik gharaunde ko udasi de kar

muskuraate hain darichon mein ishaare kya kya

uf ye ummid ka madfan ye mohabbat ka mazar

is mein dekhe hain tabahi ke nazare kya kya

jis ne aaankhon mein sitare se kabhi ghole the

aaj ehsas pe kajal sa bikhera us ne

jis ne KHud aa ke TaTola tha mere sine ko

le liya ghair ke pahlu mein basera us ne

wo talawwun ki nahin jis ka Thikana koi

us ke andaz-e-kuhan aaj nae taur ke hain

wahi bebak ishaare wahi bhaDke hue git

kal mere hath bike aaj kisi aur ke hain

wo mahakta sa chahakta sa ubalta sina

us ki miad hai do roz lipaTne ke liye

zulf bikhri hui bikhri to nahin rah sakti

phailta hai koi saya to simaTne ke liye