mae ni

kitnī achchhī thī vo zamīñ maa.e

jahāñ tum mere saath rahtī thī

bistar par rātoñ ko tum mujh ko

saif-ul-mulūk aur

pariyoñ kī koī kahānī sunātī thī

āsmān meñ puurā chāñd dekh kar

mujhe tāmchīnī kī thālī meñ

tumhārī roTī yaad aatī thī

machal kar maiñ jab roTī banāne kī

tum se zid kartī thī

to hañs kar Tāltī mujh ko

tum ye kahtī thiiñ

pahle baḌī to ho jaao

nuur taḌke sūraj kī kirnoñ meñ

tumhārī muskurāhaT jagmagātī thī

mujhe bakriyoñ ke pīchhe bhej kar

jab apne kāmoñ meñ

tum mujh ko bhuul jaatī thī

to vaadī kī narm ghaas par phudakte

havā se bāteñ kartī thī

titliyoñ ko haule se pakaḌ kar

hamesha chhoḌ detī thī

tum ne kahā thā maa.e kisī ko dukh na pahchānā

ki tum achchhī bachchī ho

pariyāñ chiḌiyoñ ke bhes meñ aa kar

daana chugeñgī merī hathelī se

jab koī chiḌiyā chahchahātī thī

maiñ khilkhilā kar zor se hañstī

magar ammī ab mujh ko

zamīñ kī taraf dekh kar

Dar sā lagtā hai

vo kaun the maa.e

jinhoñ ne merī bakriyoñ charāgāhoñ se chhīn kar mujh ko

añdheroñ ke havāle kar diyā maa.e

aur vahāñ se bhejte vaqt mujhe tum se

milne bhī na diyā

vo insān to na the maa.e

magar vo

insānoñ jaise dikhte the

maiñ to achchhī bachchī thī

tum be-shak pūchh lenā

chiḌiyoñ se titlī se

havāoñ se jhiil kināroñ

kañval ke phūloñ se

sarsarāte naag kab aa.e

tum pūchhnā is vaadī se pahāḌoñ se

merī bakriyoñ se aur abbā se

mujhe to is dhartī se pyaar thā kitnā

maiñ tumhārī tarah roTī banātī

jab baḌī hotī

Dhak kar āñchal se sar ko

pyaar se khānā khilātī

bas itnā hī to ḳhvāb thā merā

magar un logoñ ne

mujhe chīrā thā maa.e

aarī se bijlī ke nañge tāroñ muta.affin sāñsoñ se

tumheñ yaad hai maa.e

mujhe dauḌte bhāgte

jab kabhī choT lagtī thī

maiñ dauḌ kar aatī thī

tumheñ apnī choTeñ dikhātī thī

duā paḌh kar tum phūñk detī thī

magar us din na aa.iiñ tum

maiñ kitnā taḌpī thī

duāoñ ke sab hisār kyoñ TuuT ga.e maa.e

tum ne kab batāyā thā

koī dard aisā bhī hotā hai

jo maut ban kar Dor kaaT de sāñsoñ kī

aur nāsūr ban kar

tumhāre dil meñ Thahar jaa.e

kitni achchhi thi wo zamin mae

jahan tum mere sath rahti thi

bistar par raaton ko tum mujh ko

saif-ul-muluk aur

pariyon ki koi kahani sunati thi

aasman mein pura chand dekh kar

mujhe tamchini ki thaali mein

tumhaari roTi yaad aati thi

machal kar main jab roTi banane ki

tum se zid karti thi

to hans kar Talti mujh ko

tum ye kahti thin

pahle baDi to ho jao

nur taDke suraj ki kirnon mein

tumhaari muskurahaT jagmagati thi

mujhe bakriyon ke pichhe bhej kar

jab apne kaamon mein

tum mujh ko bhul jati thi

to wadi ki narm ghas par phudakte

hawa se baaten karti thi

titliyon ko haule se pakaD kar

hamesha chhoD deti thi

tum ne kaha tha mae kisi ko dukh na pahchana

ki tum achchhi bachchi ho

pariyan chiDiyon ke bhes mein aa kar

dana chugengi meri hatheli se

jab koi chiDiya chahchahati thi

main khilkhila kar zor se hansti

magar ammi ab mujh ko

zamin ki taraf dekh kar

Dar sa lagta hai

wo kaun the mae

jinhon ne meri bakriyon charagahon se chhin kar mujh ko

andheron ke hawale kar diya mae

aur wahan se bhejte waqt mujhe tum se

milne bhi na diya

wo insan to na the mae

magar wo

insanon jaise dikhte the

main to achchhi bachchi thi

tum be-shak puchh lena

chiDiyon se titli se

hawaon se jhil kinaron

kanwal ke phulon se

sarsaraate nag kab aae

tum puchhna is wadi se pahaDon se

meri bakriyon se aur abba se

mujhe to is dharti se pyar tha kitna

main tumhaari tarah roTi banati

jab baDi hoti

Dhak kar aanchal se sar ko

pyar se khana khilati

bas itna hi to KHwab tha mera

magar un logon ne

mujhe chira tha mae

aari se bijli ke nange taron mutaffin sanson se

tumhein yaad hai mae

mujhe dauDte bhagte

jab kabhi choT lagti thi

main dauD kar aati thi

tumhein apni choTen dikhati thi

dua paDh kar tum phunk deti thi

magar us din na aain tum

main kitna taDpi thi

duaon ke sab hisar kyon TuT gae mae

tum ne kab bataya tha

koi dard aisa bhi hota hai

jo maut ban kar Dor kaT de sanson ki

aur nasur ban kar

tumhaare dil mein Thahar jae