malumat-e-najma

ḳharābī us ke pardoñ meñ nihāñ mālūm hotī hai

mirī hastī mujhī ko dāstāñ mālūm hotī hai

vafūr-e-josh-e-sajda kī na pūchho kār-farmā.ī

jabīn-e-shauq juzv-e-āstāñ mālūm hotī hai

qavī hotā hai jazb-e-justujū har nā-murādī se

ba-zāhir sa.ī-e-paiham rā.egāñ mālūm hotī hai

payām-e-dilbarī detī hai mujh ko kis lagāvaT se

adā-e-husn dil kī rāz-dāñ mālūm hotī hai

mirī turbat pe rakkhā haath kis rashk-e-masīhā ne

rag-e-sang-e-lahad nabz-e-tapāñ mālūm hotī hai

nihāñ haiñ husn kī ra.anā.iyāñ pahnā-e-ālam meñ

jabhī to aaj tak duniyā javāñ mālūm hotī hai

dimāġh apnā qadam rakhte hī pahūñchā arsh-e-a.alā par

zamīn-e-kū-e-jānāñ āsmāñ mālūm hotī hai

lagā rahtā hai dhaḌkā ranj-o-ġham kā aish-o-ishrat meñ

har ik rāhat jahāñ kī ġham-nishāñ mālūm hotī hai

mirā dard-e-nihāñ hai āshkārā merī sūrat se

ḳhamoshī bhī mirī 'najma' fuġhāñ mālūm hotī hai

KHarabi us ke pardon mein nihan malum hoti hai

meri hasti mujhi ko dastan malum hoti hai

wafur-e-josh-e-sajda ki na puchho kar-farmai

jabin-e-shauq juzw-e-astan malum hoti hai

qawi hota hai jazb-e-justuju har na-muradi se

ba-zahir sai-e-paiham raegan malum hoti hai

payam-e-dilbari deti hai mujh ko kis lagawaT se

ada-e-husn dil ki raaz-dan malum hoti hai

meri turbat pe rakkha hath kis rashk-e-masiha ne

rag-e-sang-e-lahad nabz-e-tapan malum hoti hai

nihan hain husn ki ranaiyan pahna-e-alam mein

jabhi to aaj tak duniya jawan malum hoti hai

dimagh apna qadam rakhte hi pahuncha arsh-e-ala par

zamin-e-ku-e-jaanan aasman malum hoti hai

laga rahta hai dhaDka ranj-o-gham ka aish-o-ishrat mein

har ek rahat jahan ki gham-nishan malum hoti hai

mera dard-e-nihan hai aashkara meri surat se

KHamoshi bhi meri 'najma' fughan malum hoti hai