man

maañ tirā pyaar meñ Duubā huā chehra mujh ko

aaj bhī yaad jab aatā hai to ro detā huuñ

aaj bhī tere takallum se samā'at merī

yuuñ mahaktī hai ki jaise tū mire sāmne hai

aaj bhī terī du'āoñ ke ghane saa.e meñ

merī sāñsoñ kā ye nādīda safar jaarī hai

ai mirī maañ

ai mire pyaar meñ Duubī huī maañ

aaj bhī qabr pe jab aa ke tirī baiThtā huuñ

gher letī haiñ mujhe kitnī hī yādeñ terī

aisā lagtā hai mire sāmne tū baiThī hai

aur maiñ god meñ sar rakh ke tirī leTā huuñ

aur tū pyaar se āñchal meñ chhupā.e mujh ko

saarī duniyā kī balāoñ se bachā.e hue hai

ai mirī maañ

ai mire pyaar meñ Duubī huī maañ

mirī āñkhoñ meñ haiñ raqsāñ vo manāzir saare

jin meñ māñ-bāp bahan bhaa.ī sabhī raushan haiñ

yaad aatā hai mujhe ghar kā vo āñgan dālān

jis meñ har samt khile the tirī mamtā ke gulāb

aur vo taḳht vo chaukī vo masahrī vo palang

baiTh kar jis pe tū masrūf-e-du'ā rahtī thī

apne bachchoñ ke liye shām-o-sahar martī thī

ai mirī maañ

ai mire pyaar meñ Duubī huī maañ

maiñ tujhe kaise batā.ūñ ki ye āñkheñ merī

aaj tak bhuul nahīñ paa.ī haiñ chehrā terā

aaj bhī DhūñDhtī rahtī haiñ nigāheñ tujh ko

aaj bhī dekhtī rahtī haiñ sarāpā terā

ai mirī maañ

ai mire pyaar meñ Duubī huī maañ

tū nahīñ hai to havādis se bharī duniyā meñ

kaun ab mujh ko balāoñ se bachāne ke liye

koī tā'vīz gale meñ mujhe pahnā.egā

kaun qur.ān-e-muqaddas kī havā degā mujhe

kaun minnat ke mirī aa ke bharegā kūñDe

kaun bāñdhegā mire baazū pe tā'vīz-e-imām

kaun pahnā.egā ab sabz qabā-e-darvesh

kaun ab mujh ko moharram meñ banā.egā faqīr

ab to vo paan ke biiḌe kī rivāyat bhī nahīñ

vaqt-e-ruḳhsat jo tire haath se khā letā thā

ai mirī maañ

ai mire pyaar meñ Duubī huī maañ

ab yahāñ kuchh bhī nahīñ hai tirī yādoñ ke sivā

man tera pyar mein Duba hua chehra mujh ko

aaj bhi yaad jab aata hai to ro deta hun

aaj bhi tere takallum se sama'at meri

yun mahakti hai ki jaise tu mere samne hai

aaj bhi teri du'aon ke ghane sae mein

meri sanson ka ye nadida safar jari hai

ai meri man

ai mere pyar mein Dubi hui man

aaj bhi qabr pe jab aa ke teri baiThta hun

gher leti hain mujhe kitni hi yaaden teri

aisa lagta hai mere samne tu baiThi hai

aur main god mein sar rakh ke teri leTa hun

aur tu pyar se aanchal mein chhupae mujh ko

sari duniya ki balaon se bachae hue hai

ai meri man

ai mere pyar mein Dubi hui man

meri aankhon mein hain raqsan wo manazir sare

jin mein man-bap bahan bhai sabhi raushan hain

yaad aata hai mujhe ghar ka wo aangan dalan

jis mein har samt khile the teri mamta ke gulab

aur wo taKHt wo chauki wo masahri wo palang

baiTh kar jis pe tu masruf-e-du'a rahti thi

apne bachchon ke liye sham-o-sahar marti thi

ai meri man

ai mere pyar mein Dubi hui man

main tujhe kaise bataun ki ye aankhen meri

aaj tak bhul nahin pai hain chehra tera

aaj bhi DhunDhti rahti hain nigahen tujh ko

aaj bhi dekhti rahti hain sarapa tera

ai meri man

ai mere pyar mein Dubi hui man

tu nahin hai to hawadis se bhari duniya mein

kaun ab mujh ko balaon se bachane ke liye

koi ta'wiz gale mein mujhe pahnaega

kaun quran-e-muqaddas ki hawa dega mujhe

kaun minnat ke meri aa ke bharega kunDe

kaun bandhega mere bazu pe ta'wiz-e-imam

kaun pahnaega ab sabz qaba-e-darwesh

kaun ab mujh ko moharram mein banaega faqir

ab to wo pan ke biDe ki riwayat bhi nahin

waqt-e-ruKHsat jo tere hath se kha leta tha

ai meri man

ai mere pyar mein Dubi hui man

ab yahan kuchh bhi nahin hai teri yaadon ke siwa