mas ki aurat

vo hāmilīn pasliyāñ

jo aadmī ke kankāl ko

naav banā kar

khenā chāhtī haiñ aaj

bād-e-muḳhālif ke bar-aks

mauj-e-havādis ke ḳhilāf

apne mafād meñ

to is meñ

kyā hai un kā qusūr

tanhā.ī se jo achānak

ghabrā ga.e the hazrat-e-ādam

bas isī baat kā saarā fasāna

saarā futūr

phir to paslī-e-ādam se

numū-pazīr huā vajūd-e-zan

isī vajūd-e-zan se paḌā

shayātīn meñ ran

hattā ki

gandum khā lene kī pādāsh meñ

bāġh-e-bahisht ke makīñ

aa ga.e zer-e-zamīñ

gardish-e-falak kī zad meñ

idhar

shajar-e-mamnūa kā phal chakhne ke sabab

tauba karte rahe hazrat-e-ādam

aur bahāte rahe tamām umr

apne ashk-e-infi.āl

ab jo fazā badlī hai achānak

to.....

un hī hāmilīn pasliyoñ ne

gandum kī tarġhīb ko bhuul ke

masāvī haq kā

uThāyā hai savāl

to is meñ

kyā hai in kā qusūr

tanhā.ī se jo achānak

ghabrā ga.e the hazrat-e-ādam

bas isī baat kā hai saarā fasāna

saarā futūr

faisla

tab bhī aadmī ke haath meñ thā

faisla ab bhī hai

aadmī ke haath meñ

aayā parastish kare yā huqūq-e-musāviyāna de

aur jise chāhe baḌh kar apnā le

ek taraf

narm garm maas kī aurat hai

to dūsrī taraf hai

jannat kī huur

wo hamilin pasliyan

jo aadmi ke kankal ko

naw bana kar

khena chahti hain aaj

baad-e-muKHalif ke bar-aks

mauj-e-hawadis ke KHilaf

apne mafad mein

to is mein

kya hai un ka qusur

tanhai se jo achanak

ghabra gae the hazrat-e-adam

bas isi baat ka sara fasana

sara futur

phir to pasli-e-adam se

numu-pazir hua wajud-e-zan

isi wajud-e-zan se paDa

shayatin mein ran

hatta ki

gandum kha lene ki padash mein

bagh-e-bahisht ke makin

aa gae zer-e-zamin

gardish-e-falak ki zad mein

idhar

shajar-e-mamnua ka phal chakhne ke sabab

tauba karte rahe hazrat-e-adam

aur bahate rahe tamam umr

apne ashk-e-infial

ab jo faza badli hai achanak

to

un hi hamilin pasliyon ne

gandum ki targhib ko bhul ke

masawi haq ka

uThaya hai sawal

to is mein

kya hai in ka qusur

tanhai se jo achanak

ghabra gae the hazrat-e-adam

bas isi baat ka hai sara fasana

sara futur

faisla

tab bhi aadmi ke hath mein tha

faisla ab bhi hai

aadmi ke hath mein

aaya parastish kare ya huquq-e-musawiyana de

aur jise chahe baDh kar apna le

ek taraf

narm garm mas ki aurat hai

to dusri taraf hai

jannat ki hur