matam-e-nim-shab

jab maiñ aur tū niDhāl ho jaate haiñ

sāñseñ phūltī haiñ

o rahm pahle Dhīle aur phir sard paḌ jaate haiñ

aur hamāre chehre apnī aslī hālat par aa jaate haiñ

to be-iḳhtiyār sochtā huuñ

hamārā kyā hogā agar saath chhūT gayā

tumhārā kyā hogā mere baġhair

merā kyā hogā tere baġhair

maiñ to soch bhī nahīñ saktā

ki to mere jīte-jī mar jaa.e

aur na ye soch saktā huuñ

ki to kaise ro.egī

agar maiñ tum se pahle mar gayā

ham kitne be-bas aur akele haiñ

kyā ye mumkin nahīñ ki ham apnī jāneñ ik hī qālib meñ samo leñ

taaki man-o-tū kā jhagḌā hī miT jaa.e

ham ek hī shāḳh ke do phuul haiñ

hamārā mazāq aur mizāj ek hai

hamārā lutf-e-badan ek hai

hamārā sachchā man ek hai

to phir ham judā kyuuñ ho jaa.eñ

koī rāsta nahīñ kyā

koī chāra nahīñ kyā

aisī koī sūrat banā

ki ham do diloñ ko dhaḌaktā

aur dinoñ ko chamaktā rakh sakeñ

aur phir

maiñ shahr-dar-shahr jāgtā phirūñ

kūcha-o-bāzār meñ bhāgtā phirūñ

aur terī āvāz hamesha āsmāñ kī bulandiyoñ se

utartī rahe aur zamīn ko jagātī rahe

aur maiñ mohabbat ke sāgar par suroñ kī darshā karūñ

jism kitnā nahīf hai

aur ham is liye is qālib meñ Dhāle ga.e

ki fanā kī lazzat se āshnā ho jaa.eñ

maiñ maut ke baare meñ kuchh ziyāda hī sochtā huuñ

jab terī sāñseñ mere shānoñ par dastak nahīñ detīñ

to maiñ kaañp uThtā huuñ

maiñ maut ke sukūt se Dartā huuñ

magar vo ghaḌī aa.egī

jab ham meñ se ek pahle zamīn maiñ utregā

sausan ke safed aur kāsnī phūloñ kī chādar oḌhe

har taraf se rone kī āvāz aa.egī

phir ḳhāmoshī hogī

sukūt hogā

aur qabr meñ sukūt achchhā lagegā

aur qabr se bāhar jise sukūt bardāsht karne kī sazā milegī

is kī hālat kitnī bhayānak hogī

ab tū hī batā kyā kareñ

kitnī mushkil sūrat-e-hāl hai

ki tere gudāz badan ke lams se aur

tere lafzoñ kī khan-khanāhaT se hī

maiñ terī mohabbat ko samajh saktā huuñ

badan se pare

sarhad-e-idrāk ke us paar

maiñ tum tak rasā.ī paane se qāsir huuñ

aur jab jism kā ye rishta TuuT jā.egā

to jahāñ ham us vaqt soch meñ gum haiñ

vahāñ ek ḳhālī piñjra hogā

jab main aur tu niDhaal ho jate hain

sansen phulti hain

o rahm pahle Dhile aur phir sard paD jate hain

aur hamare chehre apni asli haalat par aa jate hain

to be-iKHtiyar sochta hun

hamara kya hoga agar sath chhuT gaya

tumhaara kya hoga mere baghair

mera kya hoga tere baghair

main to soch bhi nahin sakta

ki to mere jite-ji mar jae

aur na ye soch sakta hun

ki to kaise roegi

agar main tum se pahle mar gaya

hum kitne be-bas aur akele hain

kya ye mumkin nahin ki hum apni jaanen ek hi qalib mein samo len

taki man-o-tu ka jhagDa hi miT jae

hum ek hi shaKH ke do phul hain

hamara mazaq aur mizaj ek hai

hamara lutf-e-badan ek hai

hamara sachcha man ek hai

to phir hum juda kyun ho jaen

koi rasta nahin kya

koi chaara nahin kya

aisi koi surat bana

ki hum do dilon ko dhaDakta

aur dinon ko chamakta rakh saken

aur phir

main shahr-dar-shahr jagta phirun

kucha-o-bazar mein bhagta phirun

aur teri aawaz hamesha aasman ki bulandiyon se

utarti rahe aur zamin ko jagati rahe

aur main mohabbat ke sagar par suron ki darsha karun

jism kitna nahif hai

aur hum is liye is qalib mein Dhaale gae

ki fana ki lazzat se aashna ho jaen

main maut ke bare mein kuchh ziyaada hi sochta hun

jab teri sansen mere shanon par dastak nahin detin

to main kanp uThta hun

main maut ke sukut se Darta hun

magar wo ghaDi aaegi

jab hum mein se ek pahle zamin main utrega

sausan ke safed aur kasni phulon ki chadar oDhe

har taraf se rone ki aawaz aaegi

phir KHamoshi hogi

sukut hoga

aur qabr mein sukut achchha lagega

aur qabr se bahar jise sukut bardasht karne ki saza milegi

is ki haalat kitni bhayanak hogi

ab tu hi bata kya karen

kitni mushkil surat-e-haal hai

ki tere gudaz badan ke lams se aur

tere lafzon ki khan-khanahaT se hi

main teri mohabbat ko samajh sakta hun

badan se pare

sarhad-e-idrak ke us par

main tum tak rasai pane se qasir hun

aur jab jism ka ye rishta TuT jaega

to jahan hum us waqt soch mein gum hain

wahan ek KHali pinjra hoga