mazarat

mujhe muaaf karnā

havāoñ ke pur-soz chehro

ki maiñ ne tumhāre falak-dar-falak tevaroñ kā sarāb bhī paayā nahīñ hai

mujhe muaaf karnā sitāroñ ke saayo

tumhārī siyāhī ke bosīda nuqtoñ meñ Dhalne se ab tak maiñ qāsir rahā huuñ

ġhayāboñ kī nazroñ se tanhā bahā huuñ

mujhe muaaf karnā mohabbat ke hāmil sarābo

ki bāñhoñ meñ aa kar basā huuñ tumhārī

samundar kī ujḌī sadāoñ kī sūrat

kise DhūñDtī hai mirī be-zabānī

mujhe muaaf karnā abhī tak maiñ ye jaan paayā nahīñ huuñ

mujhe muaaf karnā abad ke salāsil meñ jakḌī huī saarī chīzo

ki maiñ vaqt kī buuñd meñ pyaas kī tarah boyā gayā huuñ

zamānoñ kī āñkhoñ se royā gayā huuñ

maiñ manzar kisī lamha māvarā kā

maiñ ham-asr huuñ titliyoñ ke paroñ kā

havā kā

ḳhudā

mujhe muaf karna

hawaon ke pur-soz chehro

ki main ne tumhaare falak-dar-falak tewaron ka sarab bhi paya nahin hai

mujhe muaf karna sitaron ke sayo

tumhaari siyahi ke bosida nuqton mein Dhalne se ab tak main qasir raha hun

ghayabon ki nazron se tanha baha hun

mujhe muaf karna mohabbat ke hamil sarabo

ki banhon mein aa kar basa hun tumhaari

samundar ki ujDi sadaon ki surat

kise DhunDti hai meri be-zabani

mujhe muaf karna abhi tak main ye jaan paya nahin hun

mujhe muaf karna abad ke salasil mein jakDi hui sari chizo

ki main waqt ki bund mein pyas ki tarah boya gaya hun

zamanon ki aankhon se roya gaya hun

main manzar kisi lamha mawara ka

main ham-asr hun titliyon ke paron ka

hawa ka

KHuda