mazuri

ḳhalvat-o-jalvat meñ tum mujh se milī ho bār-hā

tum ne kyā dekhā nahīñ maiñ muskurā saktā nahīñ

maiñ ki māyūsī mirī fitrat meñ dāḳhil ho chukī

jabr bhī ḳhud par karūñ to gungunā saktā nahīñ

mujh meñ kyā dekhā ki tum ulfat kā dam bharne lagīñ

maiñ to ḳhud apne bhī koī kaam aa saktā nahīñ

rūh-afzā haiñ junūn-e-ishq ke naġhme magar

ab maiñ in gaa.e hue gītoñ ko gā saktā nahīñ

maiñ ne dekhā hai shikast-e-sāz-e-ulfat kā samāñ

ab kisī tahrīk par barbat uThā saktā nahīñ

dil tumhārī shiddat-e-ehsās se vāqif to hai

apne ehsāsāt se dāman chhuḌā saktā nahīñ

tum mirī ho kar bhī begāna hī pāogī mujhe

maiñ tumhārā ho ke bhī tum meñ samā saktā nahīñ

gaa.e haiñ maiñ ne ḳhulūs-e-dil se bhī ulfat ke giit

ab riyā-kārī se bhī chāhūñ to gā saktā nahīñ

kis tarah tum ko banā luuñ maiñ sharīk-e-zindagī

maiñ to apnī zindagī kā baar uThā saktā nahīñ

yaas kī tārīkiyoñ meñ Duub jaane do mujhe

ab maiñ sham-e-ārzū kī lau baḌhā saktā nahīñ

KHalwat-o-jalwat mein tum mujh se mili ho bar-ha

tum ne kya dekha nahin main muskura sakta nahin

main ki mayusi meri fitrat mein daKHil ho chuki

jabr bhi KHud par karun to gunguna sakta nahin

mujh mein kya dekha ki tum ulfat ka dam bharne lagin

main to KHud apne bhi koi kaam aa sakta nahin

ruh-afza hain junun-e-ishq ke naghme magar

ab main in gae hue giton ko ga sakta nahin

main ne dekha hai shikast-e-saz-e-ulfat ka saman

ab kisi tahrik par barbat uTha sakta nahin

dil tumhaari shiddat-e-ehsas se waqif to hai

apne ehsasat se daman chhuDa sakta nahin

tum meri ho kar bhi begana hi paogi mujhe

main tumhaara ho ke bhi tum mein sama sakta nahin

gae hain main ne KHulus-e-dil se bhi ulfat ke git

ab riya-kari se bhi chahun to ga sakta nahin

kis tarah tum ko bana lun main sharik-e-zindagi

main to apni zindagi ka bar uTha sakta nahin

yas ki tarikiyon mein Dub jaane do mujhe

ab main sham-e-arzu ki lau baDha sakta nahin