mahawir

abr-e-gauhar-bār ban kar hind meñ aaya thā tū

ahl-e-duniyā ke liye paiġhām-e-haq laayā thā tū

saty bhārat meñ munī jī rūnumā tum se huā

aur ahinsā se zamāna āshnā tum se huā

jab tumhāre dushmanoñ ko kuchh gila tum se huā

raam saare ho ga.e jab sāmnā tum se huā

saare aalam par misāl-e-rang-o-bū chhāyā thā tū

ahl-e-duniyā ke liye paiġhām-e-haq laayā thā tū

maiñ bhulā saktā nahīñ aalam tirī tasvīr kā

us ne to naqsha badal Daalā mirī taqdīr kā

maiñ huuñ qaa.il 'vīr' kā aur 'vīr' kī tanvīr kā

kitnā dil-afroz hai halqa tirī zanjīr kā

jalva-e-haq kā vo ik be-laus sarmāya thā tū

ahl-e-duniyā ke liye paiġhām-e-haq laayā thā tū

ab jahāñ meñ chār-sū insāñ-kushī kā daur hai

ab zamāne kī fazā kā rang hī kuchh aur hai

aaj ke insān kā kitnā nirālā taur hai

zāhirī kuchh aur hai aur bātinī kuchh aur hai

ḳhāk-e-pāk-e-hind kā ganj-e-girāñ-māya thā tū

ahl-e-duniyā ke liye paiġhām-e-haq laayā thā tū

abr-e-gauhar-bar ban kar hind mein aaya tha tu

ahl-e-duniya ke liye paigham-e-haq laya tha tu

saty bhaarat mein muni ji runuma tum se hua

aur ahinsa se zamana aashna tum se hua

jab tumhaare dushmanon ko kuchh gila tum se hua

ram sare ho gae jab samna tum se hua

sare aalam par misal-e-rang-o-bu chhaya tha tu

ahl-e-duniya ke liye paigham-e-haq laya tha tu

main bhula sakta nahin aalam teri taswir ka

us ne to naqsha badal Dala meri taqdir ka

main hun qail 'wir' ka aur 'wir' ki tanwir ka

kitna dil-afroz hai halqa teri zanjir ka

jalwa-e-haq ka wo ek be-laus sarmaya tha tu

ahl-e-duniya ke liye paigham-e-haq laya tha tu

ab jahan mein chaar-su insan-kushi ka daur hai

ab zamane ki faza ka rang hi kuchh aur hai

aaj ke insan ka kitna nirala taur hai

zahiri kuchh aur hai aur baatini kuchh aur hai

KHak-e-pak-e-hind ka ganj-e-giran-maya tha tu

ahl-e-duniya ke liye paigham-e-haq laya tha tu