main aur tum

raat ke pichhle pahar kī sunsān saḌkeñ

rim-jhim barastī bārish kī phuvār meñ bhīgtī

jaise jī uThī thiiñ

jab mere haath apne hāthoñ meñ liye tum ne

lams kī hiddat se bojhal hotī

be-tartīb sāñsoñ ke beach ulajhtī

apnī dil-nashīn āvāz

mere kānoñ meñ tumhāre liye

merī āḳhirī nazm sūrat utārī thī

is anmol lamhe meñ

tumhārī zaat ke sehr meñ khoī huī maiñ

kisī anjān sī yaad kī kasak tale

dhīre se sulagte hue tum

mohabbat kā ulūhī naġhma alāptīñ

gaaḌī ke shīshoñ se Takrātīñ

rim-jhim barastī būñdeñ

dashboard pe dharī bhaap uḌātī

hamāre laboñ meñ paivast hone ko be-qarār

kaafī kī do muntazir pyāliyāñ

chahār-sū chhā.ī tumhāre ehsās kī ḳhushbū se

jaise jāvedāñ ho chale the

yaad nahīñ paḌtā hai ab

ki maiñ tum aur kaafī kī mahak

bārish ke haale meñ

tumhārī nazmoñ kī chhatrī tale

ek dūsre meñ kitnā ghul ga.e the

bas itnā pata hai

ki

vaqt

is lamhe

apnī muTThī meñ qaid

hamāre hisse ke pal

ham pe vārne

Thahar gayā thā

raat ke pichhle pahar ki sunsan saDken

rim-jhim barasti barish ki phuwar mein bhigti

jaise ji uThi thin

jab mere hath apne hathon mein liye tum ne

lams ki hiddat se bojhal hoti

be-tartib sanson ke beach ulajhti

apni dil-nashin aawaz

mere kanon mein tumhaare liye

meri aaKHiri nazm surat utari thi

is anmol lamhe mein

tumhaari zat ke sehr mein khoi hui main

kisi anjaan si yaad ki kasak tale

dhire se sulagte hue tum

mohabbat ka uluhi naghma alaptin

gaDi ke shishon se Takraatin

rim-jhim barasti bunden

dashboard pe dhari bhap uDati

hamare labon mein paiwast hone ko be-qarar

kafi ki do muntazir pyaliyan

chahaar-su chhai tumhaare ehsas ki KHushbu se

jaise jawedan ho chale the

yaad nahin paDta hai ab

ki main tum aur kafi ki mahak

barish ke haale mein

tumhaari nazmon ki chhatri tale

ek dusre mein kitna ghul gae the

bas itna pata hai

ki

waqt

is lamhe

apni muTThi mein qaid

hamare hisse ke pal

hum pe warne

Thahar gaya tha