main kab se be-Khaal-o-KHat paDa hun

kahāñ haiñ āñkheñ

maiñ jin meñ tīra-shabī kā tiryāq

āsmāñ par khile sitāroñ meñ DhūñDtā thā

maiñ dekhtā thā

jo had-e-idrāk meñ nahīñ thā

jo duur ho kar bhī mere mārūz meñ kahīñ thā

maiñ apnī poroñ se puurā chehra TaTol ke ḳhud se pūchhtā huuñ

kahāñ haiñ hoñToñ ke surḳh kone

kisī ke ruḳhsār kī amāvas kī raat meñ jo

sitāra ban ke tulū hote

jo muskurāte, to phuul jhaḌte

jo harf do harf ik kahānī kā haar bante

jo munkashif ho ke raushnī kā libās hote

kahāñ hai kānoñ kī hairatī kā sharāb-ḳhāna

jahāñ pe āvāz

bahte chashmoñ kī tāzgī kā surāġh le kar

mirī samā.at kā rizq bantī

maiñ kis se pūchhūñ

vo jis se khilte the

bārishoñ meñ mahaktī miTTī kī ḳhush-buoñ ke

tamām mafhūm ab, kahāñ hai

maiñ kab se be-ḳhāl-o-ḳhat paḌā huuñ

mirā koī saaya hī nahīñ hai

sab ā.īne jhuuT bolte haiñ

kisī ke chehre ko merā chehra dikhā rahe haiñ

kahan hain aankhen

main jin mein tira-shabi ka tiryaq

aasman par khile sitaron mein DhunDta tha

main dekhta tha

jo had-e-idrak mein nahin tha

jo dur ho kar bhi mere maruz mein kahin tha

main apni poron se pura chehra TaTol ke KHud se puchhta hun

kahan hain honTon ke surKH kone

kisi ke ruKHsar ki amawas ki raat mein jo

sitara ban ke tulu hote

jo muskuraate, to phul jhaDte

jo harf do harf ek kahani ka haar bante

jo munkashif ho ke raushni ka libas hote

kahan hai kanon ki hairati ka sharab-KHana

jahan pe aawaz

bahte chashmon ki tazgi ka suragh le kar

meri samaat ka rizq banti

main kis se puchhun

wo jis se khilte the

barishon mein mahakti miTTi ki KHush-buon ke

tamam mafhum ab, kahan hai

main kab se be-KHal-o-KHat paDa hun

mera koi saya hi nahin hai

sab aaine jhuT bolte hain

kisi ke chehre ko mera chehra dikha rahe hain