main kya kahta tha

maiñ ye kahtā thā ki nauha na kaho

kheltī titliyoñ hañstī huī kaliyoñ ke qasīde likkho

ye jo imkāñ meñ koī baas damaktī hai

ise lafz meñ laao kisī dil meñ likhe

lafz jo dil ke dabāo ko ghaTā detā hai

dil jo ik hashr uThā detā hai

maiñ ye kahtā thā

chahaktī huī chiḌiyoñ ke liye giit likho

un daraḳhtoñ se lipaT jā.ūñ

jo jalte haiñ magar sāya-kunāñ rahte haiñ

varna dil sirf ḳhizāñ rahte haiñ

abr kī baat karo

ashk tah-e-chashm dabe rahne do

maiñ ye kahtā thā

kahīñ duur khanaktī huī qilqārī ko

apne ehsās kī kyārī meñ numū paane do

vo jo fardā ke chaman meñ hai nigār mumkin

ise alfāz kī mahkār meñ so jā ne do

maiñ ye kahtā thā

magar kyā maiñ yahī kahtā thā

main ye kahta tha ki nauha na kaho

khelti titliyon hansti hui kaliyon ke qaside likkho

ye jo imkan mein koi bas damakti hai

ise lafz mein lao kisi dil mein likhe

lafz jo dil ke dabao ko ghaTa deta hai

dil jo ek hashr uTha deta hai

main ye kahta tha

chahakti hui chiDiyon ke liye git likho

un daraKHton se lipaT jaun

jo jalte hain magar saya-kunan rahte hain

warna dil sirf KHizan rahte hain

abr ki baat karo

ashk tah-e-chashm dabe rahne do

main ye kahta tha

kahin dur khanakti hui qilqari ko

apne ehsas ki kyari mein numu pane do

wo jo farda ke chaman mein hai nigar mumkin

ise alfaz ki mahkar mein so ja ne do

main ye kahta tha

magar kya main yahi kahta tha