maine raat se pucha

maiñ ne raat se pūchā

''mere ghar se chorī ho jaane vaalā ḳhvāb

tumhāre paas to nahīñ

mere ham-sā.e ke bachchoñ kā ḳhvāb

gharoñ meñ baiThī javāñ laḌkiyoñ ke ḳhvāb

shahr se hijrat kar jaane vaale saare ḳhvāb

tumhāre paas to nahīñ''?

raat merī āñkhoñ meñ jhāñk kar bolī

''itne saare ḳhvāboñ kā chorī ho jaanā

aur shor na machnā

itne saare ḳhvāboñ kā qatl ho jaanā

aur surāġh na chalnā

itnī saarī lāshoñ kā dariyā meñ bahā diyā jaanā

aur paanī kā rañg na badalnā

kaise mumkin hai

tumhārī marzī ke baġhair

tumhārī shirkat ke baġhair''

phir vo god meñ uThāyā huā chāñd

merī taraf baḌhā kar bolī:

''is ke sar par haath rakho

aur qasam khaao

apnī be-gunāhī kī

apnī ma.asūmiyat kii''

aur maiñ us kā muñh taktā rah gayā

main ne raat se pucha

mere ghar se chori ho jaane wala KHwab

tumhaare pas to nahin

mere ham-sae ke bachchon ka KHwab

gharon mein baiThi jawan laDkiyon ke KHwab

shahr se hijrat kar jaane wale sare KHwab

tumhaare pas to nahin?

raat meri aankhon mein jhank kar boli

itne sare KHwabon ka chori ho jaana

aur shor na machna

itne sare KHwabon ka qatl ho jaana

aur suragh na chalna

itni sari lashon ka dariya mein baha diya jaana

aur pani ka rang na badalna

kaise mumkin hai

tumhaari marzi ke baghair

tumhaari shirkat ke baghair

phir wo god mein uThaya hua chand

meri taraf baDha kar boli:

is ke sar par hath rakho

aur qasam khao

apni be-gunahi ki

apni masumiyat ki

aur main us ka munh takta rah gaya