main sochta hun

maiñ sochtā huuñ

agar do rāste hote

tum tak jaane ke liye

kisī baaġh meñ chahal-qadmī kī tarah

yaḳh-basta pahāḌoñ meñ

safed surañgoñ jaise

agar do ḳhvāb hote

sahmī huī ḳhāmosh rātoñ meñ

jāgne ke liye

sone ke liye

agar do jangal hote

pur-asrār bhaTakne ke liye

yā duniyā-dāroñ se kaTne ke liye

agar do parinde hote

mohabbat ke liye

agar do sarāb hote

pyāsā jiine ke liye

pyāsā marne ke liye

agar do kahāniyāñ hotīñ

qadīm chaTTān par kanda

nā-qābil-e-fahm nuqūsh meñ madfūn

yaad karne ke liye

bhuul jaane ke liye

agar do giit hote

mere jiite jī

āḳhirī hichkī lene ke liye

yā mere ba.ad kuchh pal

mujhe rone ke liye

agar do sitāre hote

sub.h-e-kāzib kī dahlīz par

chamakne ke liye

bujhne ke liye

umr guzār kar

maiñ sochtā huuñ

ye mumkin nahīñ

is duniyā kī be-intihā.ī meñ

do chīzeñ nahīñ hotīñ

sivā.e do tanhā.iyoñ ke

tū

aur maiñ

main sochta hun

agar do raste hote

tum tak jaane ke liye

kisi bagh mein chahal-qadmi ki tarah

yaKH-basta pahaDon mein

safed surangon jaise

agar do KHwab hote

sahmi hui KHamosh raaton mein

jagne ke liye

sone ke liye

agar do jangal hote

pur-asrar bhaTakne ke liye

ya duniya-daron se kaTne ke liye

agar do parinde hote

mohabbat ke liye

agar do sarab hote

pyasa jine ke liye

pyasa marne ke liye

agar do kahaniyan hotin

qadim chaTTan par kanda

na-qabil-e-fahm nuqush mein madfun

yaad karne ke liye

bhul jaane ke liye

agar do git hote

mere jite ji

aaKHiri hichki lene ke liye

ya mere baad kuchh pal

mujhe rone ke liye

agar do sitare hote

subh-e-kazib ki dahliz par

chamakne ke liye

bujhne ke liye

umr guzar kar

main sochta hun

ye mumkin nahin

is duniya ki be-intihai mein

do chizen nahin hotin

siwae do tanhaiyon ke

tu

aur main