makDi ki zehanat

sunā.ūñ tumheñ aaj ik mājrā

ki ik laḌkā makḌī ke pīchhe paḌā

phir us ne baḌā ek DañDā liyā

pakaḌ kar sire par use rakh diyā

vahāñ paas thā ek dariyā baḌā

vo DanDe pe makḌī ko le ke baḌhā

bahut duur paanī meñ gaaḌā use

ki us vaqt paanī thā biphrā huā

kināre vo chup-chāp baiThā rahā

ki dekheñ tamāsha ab hotā hai kyā

nikaltī hai dariyā se kis tarah ye

chalo aao dekheñ maza aa.egā

thī kuchh der makḌī vahāñ dam-ba-ḳhud

phir utrī to har samt paanī milā

ka.ī baar utrī chaḌhī phir na jab

rihā.ī kā koī bhī rasta milā

to kuchh der vo sochtī hī rahī

phir us ne vahāñ apnā jaalā bunā

yuuñ hī sat.h-e-dariyā pe pheñkā use

ki paanī se zyāda vo vaznī na thā

vo DanDe se jaale pe aa.ī to phir

Thahar ke vahāñ aur jaalā bunā

vahāñ se use pheñkā paanī pe yuuñ

ki kuchh duur aage vo jaalā baḌhā

vo jaale se jaale pe aatī rahī

yahāñ tak ki sāhil qarīb aa gayā

vo laḌkā use dekhtā rah gayā

zehānat pe makḌī ke hairān thā

vo makḌī kināre pe yuuñ aa ga.ī

ki jaise vahāñ kuchh huā hī na thā

musībat meñ sābit qadam jo rahe

vahī hai zamāne meñ sab se baḌā

sunaun tumhein aaj ek majra

ki ek laDka makDi ke pichhe paDa

phir us ne baDa ek DanDa liya

pakaD kar sire par use rakh diya

wahan pas tha ek dariya baDa

wo DanDe pe makDi ko le ke baDha

bahut dur pani mein gaDa use

ki us waqt pani tha biphra hua

kinare wo chup-chap baiTha raha

ki dekhen tamasha ab hota hai kya

nikalti hai dariya se kis tarah ye

chalo aao dekhen maza aaega

thi kuchh der makDi wahan dam-ba-KHud

phir utri to har samt pani mila

kai bar utri chaDhi phir na jab

rihai ka koi bhi rasta mila

to kuchh der wo sochti hi rahi

phir us ne wahan apna jala buna

yun hi sath-e-dariya pe phenka use

ki pani se zyaada wo wazni na tha

wo DanDe se jale pe aai to phir

Thahar ke wahan aur jala buna

wahan se use phenka pani pe yun

ki kuchh dur aage wo jala baDha

wo jale se jale pe aati rahi

yahan tak ki sahil qarib aa gaya

wo laDka use dekhta rah gaya

zehanat pe makDi ke hairan tha

wo makDi kinare pe yun aa gai

ki jaise wahan kuchh hua hi na tha

musibat mein sabit qadam jo rahe

wahi hai zamane mein sab se baDa