manazir-e-sahar

kyā rūh-fazā jalva-e-ruḳhsār-e-sahar hai

kashmīr dil-e-zār hai firdaus-e-nazar hai

har phuul kā chehra araq-e-husn se tar hai

har chiiz meñ ik baat hai har shai meñ asar hai

har samt bhaḌaktā hai ruḳh-e-hūr kā sho.ala

har zarra-e-nāchīz meñ hai tuur kā sho.ala

larzish vo sitāroñ kī vo zarroñ kā tabassum

chashmoñ kā vo bahnā ki fidā jin pe tarannum

gardūñ pe sapedī-o-siyāhī kā tasādum

tūfān vo jalvoñ kā vo naġhmoñ kā talātum

uḌte hue gesū vo nasīm-e-saharī ke

shānoñ pe pareshān haiñ yā baal parī ke

vo phailnā ḳhushbū kā vo kaliyoñ kā chaTaknā

vo chāñdnī maddham vo samundar kā jhalaknā

vo chhāñv meñ tāroñ kī gul-e-tar kā mahaknā

vo jhūmnā sabze kā vo khetoñ kā lahaknā

shāḳhoñ se milī jaatī haiñ shāḳheñ vo asar hai

kahtī hai nasīm-e-saharī īd-e-sahar hai

ḳhunkī vo bayābāñ kī vo rañgīni-e-sahrā

vo vādī-e-sarsabz vo tālāb-e-musaffā

peshāni-e-gardūñ pe vo hañstā huā taarā

vo rāste jañgal ke vo bahtā huā dariyā

har samt gulistāñ meñ vo ambār guloñ ke

shabnam se vo dho.e hue ruḳhsār guloñ ke

vo ruuh meñ anvār-e-ḳhudā sub.h vo sādiq

vo husn jise dekh ke har aañkh ho āshiq

vo sādgī insān kī fitrat ke mutābiq

zarrīñ vo ufuq nuur se labrez vo mashriq

vo naġhma-e-dā.ūd parindoñ kī sadā meñ

pairāhan-e-yūsuf kī vo tāsīr havā meñ

vo barg-e-gul-e-tāza vo shabnam kī latāfat

ik husn se vo ḳhanda-e-sāmān-e-haqīqat

vo jalva-e-asnām vo but-ḳhāne kī zīnat

zāhid kā vo manzar vo barhaman kī sabāhat

nāqūs ke siine se sadā.eñ vo fuġhāñ kī

vo hamd meñ Duubī huī āvāz azaañ kī

aaqā kā ġhulāmoñ se ye hai qurb kā hañgām

dil hote haiñ sarshār fanā hote haiñ ālām

chhā jaatī hai rahmat to baras paḌte haiñ in.aam

is vaqt kisī tarah munāsib nahīñ ārām

rone meñ jo lazzat hai to aahoñ meñ mazā hai

ai ruuh ḳhudī chhoḌ ki nazdīk ḳhudā hai

kya ruh-faza jalwa-e-ruKHsar-e-sahar hai

kashmir dil-e-zar hai firdaus-e-nazar hai

har phul ka chehra araq-e-husn se tar hai

har chiz mein ek baat hai har shai mein asar hai

har samt bhaDakta hai ruKH-e-hur ka shoala

har zarra-e-nachiz mein hai tur ka shoala

larzish wo sitaron ki wo zarron ka tabassum

chashmon ka wo bahna ki fida jin pe tarannum

gardun pe sapedi-o-siyahi ka tasadum

tufan wo jalwon ka wo naghmon ka talatum

uDte hue gesu wo nasim-e-sahari ke

shanon pe pareshan hain ya baal pari ke

wo phailna KHushbu ka wo kaliyon ka chaTakna

wo chandni maddham wo samundar ka jhalakna

wo chhanw mein taron ki gul-e-tar ka mahakna

wo jhumna sabze ka wo kheton ka lahakna

shaKHon se mili jati hain shaKHen wo asar hai

kahti hai nasim-e-sahari id-e-sahar hai

KHunki wo bayaban ki wo rangini-e-sahra

wo wadi-e-sarsabz wo talab-e-musaffa

peshani-e-gardun pe wo hansta hua tara

wo raste jangal ke wo bahta hua dariya

har samt gulistan mein wo ambar gulon ke

shabnam se wo dhoe hue ruKHsar gulon ke

wo ruh mein anwar-e-KHuda subh wo sadiq

wo husn jise dekh ke har aankh ho aashiq

wo sadgi insan ki fitrat ke mutabiq

zarrin wo ufuq nur se labrez wo mashriq

wo naghma-e-daud parindon ki sada mein

pairahan-e-yusuf ki wo tasir hawa mein

wo barg-e-gul-e-taza wo shabnam ki latafat

ek husn se wo KHanda-e-saman-e-haqiqat

wo jalwa-e-asnam wo but-KHane ki zinat

zahid ka wo manzar wo barhaman ki sabahat

naqus ke sine se sadaen wo fughan ki

wo hamd mein Dubi hui aawaz azan ki

aaqa ka ghulamon se ye hai qurb ka hangam

dil hote hain sarshaar fana hote hain aalam

chha jati hai rahmat to baras paDte hain inam

is waqt kisi tarah munasib nahin aaram

rone mein jo lazzat hai to aahon mein maza hai

ai ruh KHudi chhoD ki nazdik KHuda hai