manTo

Daalī Daalī hai yaas kā mausam

ahl-e-urdu kī chashm pur-nam hai

nabz-e-getī ravāñ hai ruk ruk kar

kitnā ḳhamosh saarā aalam hai

krishn bedī asar kiran Thākur

be-tahāsha hī ro diye haiñ aaj

jaise har ik ne apne sarmā.e

bahr-e-ġham meñ Dubo diye haiñ aaj

sīna-e-arz meñ shigāf huā

lau charāġhoñ kī kyoñ bhaTaktī hai

sū-e-madfan pe kaun aatā hai

chashm-e-hairāñ se qabr taktī hai

haar TuuTā urūs-e-hastī kā

nausha-e-zindagī kahāñ hai aaj

vo ki bām-e-adab kī zīnat thā

vo daraḳhshāñ qamar kahāñ hai aaj

ek jarrāh thā ki jo na rahā

vo ki nashtar hī thā qalam jis kā

saaz urdu kā kaun chheḌegā

jis kā manTo hī ek mutrib thā

Dali Dali hai yas ka mausam

ahl-e-urdu ki chashm pur-nam hai

nabz-e-geti rawan hai ruk ruk kar

kitna KHamosh sara aalam hai

krishn bedi asar kiran Thakur

be-tahasha hi ro diye hain aaj

jaise har ek ne apne sarmae

bahr-e-gham mein Dubo diye hain aaj

sina-e-arz mein shigaf hua

lau charaghon ki kyon bhaTakti hai

su-e-madfan pe kaun aata hai

chashm-e-hairan se qabr takti hai

haar TuTa urus-e-hasti ka

nausha-e-zindagi kahan hai aaj

wo ki baam-e-adab ki zinat tha

wo daraKHshan qamar kahan hai aaj

ek jarrah tha ki jo na raha

wo ki nashtar hi tha qalam jis ka

saz urdu ka kaun chheDega

jis ka manTo hi ek mutrib tha