maraatib-e-wajud bhi ajib hain

achānak ik shabīh

be-sadā sī jast bhar ke

aa.ine ke paas se guzar ga.ī

siyāh zard dhāriyāñ

ki jaise lahr ek lahr se juḌī huī

siñgār mez ek dam laraz uThī

clock kā talā.ī aks bhī dahal gayā

badan jo thā buḳhār ke hisār meñ pighal gayā

marātib-e-vajūd bhī ajiib haiñ

lahū kī kauniyāt meñ

sifāt aur zaat meñ

ajab tarah ke bhed haiñ

yaqīn o zan kī chalniyoñ meñ

sau tarah ke chhed haiñ

abhī to jāgtā thā maiñ

amiiq dard meñ karāhtā thā maiñ

phir aañkh kaise lag ga.ī

abhī to sau rahā thā maiñ

phir aañkh kaise khul ga.ī

badan se ye lihāf kā pahāḌ kaise haT gayā

ḳhabar nahīñ ki haDDiyoñ ke joḌ kis tarah khule

dahan farāḳh ho ke pīchhe kaise khiñch gayā

nukīle daañt kis tarah nikal paḌe

nigāheñ kaise shola-rū huiiñ

na jaane kaise dast-o-pā kī uñgliyāñ muḌī

kamar lachak sī khā ke kaise phailtī ga.ī

ye jild kaise saḳht khaal meñ Dhalī

ye gupphe-dār dum kahāñ se aa ga.ī

vajūd ke kachār meñ

dahāḌtā huā

zaqand bhar ke maiñ kahāñ chalā gayā

mujhe to kuchh patā nahīñ

marātib-e-vajūd bhī ajiib haiñ

achanak ek shabih

be-sada si jast bhar ke

aaine ke pas se guzar gai

siyah zard dhaariyan

ki jaise lahr ek lahr se juDi hui

singar mez ek dam laraz uThi

clock ka talai aks bhi dahal gaya

badan jo tha buKHar ke hisar mein pighal gaya

maraatib-e-wajud bhi ajib hain

lahu ki kauniyat mein

sifat aur zat mein

ajab tarah ke bhed hain

yaqin o zan ki chalniyon mein

sau tarah ke chhed hain

abhi to jagta tha main

amiq dard mein karahta tha main

phir aankh kaise lag gai

abhi to sau raha tha main

phir aankh kaise khul gai

badan se ye lihaf ka pahaD kaise haT gaya

KHabar nahin ki haDDiyon ke joD kis tarah khule

dahan faraKH ho ke pichhe kaise khinch gaya

nukile dant kis tarah nikal paDe

nigahen kaise shola-ru huin

na jaane kaise dast-o-pa ki ungliyan muDi

kamar lachak si kha ke kaise phailti gai

ye jild kaise saKHt khaal mein Dhali

ye gupphe-dar dum kahan se aa gai

wajud ke kachaar mein

dahaDta hua

zaqand bhar ke main kahan chala gaya

mujhe to kuchh pata nahin

maraatib-e-wajud bhi ajib hain