mardana kamzori

koī apnā marā

merā apnā marā

mere āñgan meñ mātam kī saf bichh ga.ī

'aurateñ bain kartī rahīñ

bachche rote rahe

maiñ nahīñ ro sakā

merī pahlī mohabbat jo sachchī bhī thī

aur sachchī bhī thī

jab kisī ne use mustarad kar diyā

mere siine meñ yak-dam ghuTan bhar ga.ī

saañs rukne lagī

maiñ nahīñ ro sakā

mujh pe tohmat lagā.ī kisī shaḳhs ne

mere kirdār kī laash par paañv rakh kar vo ūñchā huā

mere pairoñ ke nīche zamīñ na rahī

maiñ nahīñ ro sakā

jaise charvāhā jholī meñ patte dikhā kar

jo hote nahīñ haiñ bulātā hai apnī taraf bakriyāñ

mujh ko aise kisī ne kahā aa mohabbat kareñ

us ke nazdīk jā kar khulā

us kī jholī meñ chāhat ke patte nahīñ

merī chīḳheñ gale meñ rukī rah ga.iiñ

maiñ nahīñ ro sakā

maiñ ne daftar meñ ik naukrī DhūñD lī

thoḌā thoḌā vahāñ roz martā rahā

kaam kartā rahā

mere kānoñ meñ laavā uñDelā gayā

mere chehre kī raunaq miTā.ī ga.ī

ek ik rag se ḳhuuñ ko nichoḌā gayā

merā saarā badan zard hotā rahā

dard hotā rahā

maiñ nahīñ ro sakā

mere kāñdhe pe 'aurat ko rakkhā gayā

pusht par baap kā kumba laadā gayā

sar pe kavve bhī bhūke biThā.e ga.e

mere hāthoñ meñ talvār de dī ga.ī

mujh ko mere ḳhudā se Darāyā gayā

jab kamar jhuk ga.ī

maiñ ghisaT kar chalā

kuhniyāñ chhil ga.iiñ

ghuTne zaḳhmī hue

ḳhuun ristā rahā

maiñ nahīñ ro sakā

hādsoñ āfatoñ

bam dhamākoñ vabāoñ meñ aur jang meñ

mere apnoñ kī lāsheñ uThā.ī ga.iiñ

merā dil bhar ke āñkhoñ talak aa gayā

maiñ nahīñ ro sakā

raat duniyā se chhup kar

maiñ aise jahāñ ko ḳhayāloñ meñ

laatā huuñ jis meñ sabhī dost hoñ

is tarah jis tarah

peḌ kī ek Tahnī kaTe to sabhī Tahniyāñ

ḳhud pe mahsūs kartī haiñ

aare ke daañt

aur sabhī Tahniyāñ apnā ras bāñTtī haiñ kaTī shāḳh se

phir ka.ī Tahniyāñ phūTtī haiñ usī shāḳh se

ek aise jahāñ ko ḳhayāloñ meñ laatā huuñ

jis meñ sabhī 'aurateñ

shādmānī meñ khul kar hañseñ

dard meñ mard bhī ro sakeñ

maiñ bahut ro ke chillā ke duniyā ko batlā sakūñ

mere ā'sāb meñ kis qadar dard hai

maiñ tasavvur meñ laatā huuñ aisī jagah

jis jagah mujh ko rotā huā dekh kar

koī ye na kahe

mard ban mard ban

sub.h hote hī maiñ

apnī saarī aziyyat ko

kāñdhoñ pe laade hue kaam par jaatā huuñ

is jahāñ ke ḳhayāloñ se bāhar nikal aatā huuñ

kyoñ ki aisā jahāñ

merī mardāngī ko gavārā nahīñ

koi apna mara

mera apna mara

mere aangan mein matam ki saf bichh gai

'auraten bain karti rahin

bachche rote rahe

main nahin ro saka

meri pahli mohabbat jo sachchi bhi thi

aur sachchi bhi thi

jab kisi ne use mustarad kar diya

mere sine mein yak-dam ghuTan bhar gai

sans rukne lagi

main nahin ro saka

mujh pe tohmat lagai kisi shaKHs ne

mere kirdar ki lash par panw rakh kar wo uncha hua

mere pairon ke niche zamin na rahi

main nahin ro saka

jaise charwaha jholi mein patte dikha kar

jo hote nahin hain bulata hai apni taraf bakriyan

mujh ko aise kisi ne kaha aa mohabbat karen

us ke nazdik ja kar khula

us ki jholi mein chahat ke patte nahin

meri chiKHen gale mein ruki rah gain

main nahin ro saka

main ne daftar mein ek naukri DhunD li

thoDa thoDa wahan roz marta raha

kaam karta raha

mere kanon mein lawa unDela gaya

mere chehre ki raunaq miTai gai

ek ek rag se KHun ko nichoDa gaya

mera sara badan zard hota raha

dard hota raha

main nahin ro saka

mere kandhe pe 'aurat ko rakkha gaya

pusht par bap ka kumba lada gaya

sar pe kawwe bhi bhuke biThae gae

mere hathon mein talwar de di gai

mujh ko mere KHuda se Daraya gaya

jab kamar jhuk gai

main ghisaT kar chala

kuhniyan chhil gain

ghuTne zaKHmi hue

KHun rista raha

main nahin ro saka

hadson aafaton

bam dhamakon wabaon mein aur jang mein

mere apnon ki lashen uThai gain

mera dil bhar ke aankhon talak aa gaya

main nahin ro saka

raat duniya se chhup kar

main aise jahan ko KHayalon mein

lata hun jis mein sabhi dost hon

is tarah jis tarah

peD ki ek Tahni kaTe to sabhi Tahniyan

KHud pe mahsus karti hain

aare ke dant

aur sabhi Tahniyan apna ras banTti hain kaTi shaKH se

phir kai Tahniyan phuTti hain usi shaKH se

ek aise jahan ko KHayalon mein lata hun

jis mein sabhi 'auraten

shadmani mein khul kar hansen

dard mein mard bhi ro saken

main bahut ro ke chilla ke duniya ko batla sakun

mere aa'sab mein kis qadar dard hai

main tasawwur mein lata hun aisi jagah

jis jagah mujh ko rota hua dekh kar

koi ye na kahe

mard ban mard ban

subh hote hi main

apni sari aziyyat ko

kandhon pe lade hue kaam par jata hun

is jahan ke KHayalon se bahar nikal aata hun

kyon ki aisa jahan

meri mardangi ko gawara nahin