masafaton ke sarab ka alamiya

dard ke shahr se

jab chale qāfile

ibtilāoñ kī pūñjī sameTe hue

hasratoñ ke nagīne damakte the talvār palkoñ pe

zaḳhmoñ ke gulzār the dil ke āñgan meñ

aur mish.aleñ zehn meñ jal rahī thiiñ ka.ī

kuchh alaav ki āñkhoñ meñ jalte rahe aur bujhte rahe

āgahī jo tazabzub kī daldal meñ thī dam-ba-ḳhud

shauq kā haath pakḌe nikal aa.ī thī kāmrāñ

paañv meñ aable

zehn meñ bijliyāñ

jab rukī ḳhuuñ kī bārish havāoñ ke pur-haul sho.ale bhī maddham hue aur dhueñ kī kasāfat chhaTī

tab kahīñ

sukh ke gaañv pe nazroñ kī kirneñ paḌīñ

jis meñ tamkīn-e-ġham azm kī rif.atoñ se gale mil ke ta.amīr-e-āsūdgī kar rahī thī

dard ke chāñd chamke to socheñ jilā pā ga.iiñ

dil ke zaḳhmoñ ne jazboñ ke phūloñ ko ik lazzat-e-tāzgī dī

to ham

apnī saarī thakan kulfateñ bhuul kar shaam hone se pahle

surḳh-rū ārzūoñ ke sehre sajā.e

ghar ke āñgan meñ pahuñche to maañ kī nigāhoñ se shafqat kī āyāt kirnoñ kī sūrat utarne lagī thiiñ

ham ne maañ ke qadam chuum kar ḳhud ko paayā

to ik ālam-e-nau janam le rahā thā

jahāñ sāñvle mausamoñ kī salonī rutoñ kī bashārat thī

raushan khilī dhuup thī aur taaza havā.eñ na.ī fasl-e-gul kī payambar banī thiiñ

ki phir chand logoñ ne

maañ kī ridā noch kar muñh pe sūraj ke maarī

to maañ ne baḌe karb se ham ko dekhā

magar ham ki jo garm ḳhuuñ ke bhī vāris the sach kī gavāhī the aur hurmatoñ ke amiiñ the

ajab taur se sar-nigūñ aur sākit khaḌe the

ḳhudā jaane kyā sochte the

dard ke shahr se

jab chale qafile

ibtilaon ki punji sameTe hue

hasraton ke nagine damakte the talwar palkon pe

zaKHmon ke gulzar the dil ke aangan mein

aur mishalen zehn mein jal rahi thin kai

kuchh alaw ki aankhon mein jalte rahe aur bujhte rahe

aagahi jo tazabzub ki daldal mein thi dam-ba-KHud

shauq ka hath pakDe nikal aai thi kaamran

panw mein aable

zehn mein bijliyan

jab ruki KHun ki barish hawaon ke pur-haul shoale bhi maddham hue aur dhuen ki kasafat chhaTi

tab kahin

sukh ke ganw pe nazron ki kirnen paDin

jis mein tamkin-e-gham azm ki rifaton se gale mil ke tamir-e-asudgi kar rahi thi

dard ke chand chamke to sochen jila pa gain

dil ke zaKHmon ne jazbon ke phulon ko ek lazzat-e-tazgi di

to hum

apni sari thakan kulfaten bhul kar sham hone se pahle

surKH-ru aarzuon ke sehre sajae

ghar ke aangan mein pahunche to man ki nigahon se shafqat ki aayat kirnon ki surat utarne lagi thin

hum ne man ke qadam chum kar KHud ko paya

to ek aalam-e-nau janam le raha tha

jahan sanwle mausamon ki saloni ruton ki bashaarat thi

raushan khili dhup thi aur taza hawaen nai fasl-e-gul ki payambar bani thin

ki phir chand logon ne

man ki rida noch kar munh pe suraj ke mari

to man ne baDe karb se hum ko dekha

magar hum ki jo garm KHun ke bhi waris the sach ki gawahi the aur hurmaton ke amin the

ajab taur se sar-nigun aur sakit khaDe the

KHuda jaane kya sochte the