mashq

barsoñ ba.ad bar-nok-e-zabān rahtā hai koī sher

phir ek din

us ke jaane pahchāne hazār martaba dohrā.e hue alfāz ke andar

khul jaatā hai ma.ānī kā ek nayā darvāza

aur rah jaate haiñ ham hakka-bakkā

jis mafhūm par sar dhunte aa.e the kal tak kitnā sat.hī kitnā adhūrā thā vo

shukr karte haiñ ki nahīñ pūchh liyā kisī ne ham se is sher kā matlab

satya-nās kar Dālte achchhe bhale sher kā in na.e ma.ānī ke baġhair ham

yahī kuchh hotā hai zindagī meñ pesh aane vaale

vāqi.āt o hādsāt ke saath bhī

jo kuchh biit gayā aur biit rahā hai ham par

der tak raaz hī nahīñ khultā us kī ahmiyat kā

be-maqsad ho rahā hai ye sab kuchh

yā is kā hamāre mustaqbil aur muqaddar se bhī ta.alluq hai kuchh

phir parda sā haTtā hai aur ho jaate haiñ ham ġharq-e-hairat

kitnā mahdūd thā hamārā naqd-e-ilm

aur kin muġhālitoñ meñ paḌe hue the ham

mujhe to ḳhūgar sā banā diyā hai roz-marra kī is hairānī o pareshānī ne

na.e se nayā sadma sahne ko tayyār rahtā huuñ sub.h o shaam

apnī jahālat ke inkishāf par

one-day cricket to shauq se dekhte haiñ aap bhī

yuuñ samajhiye ki mashq thā guzishta kal kā match aaj ke match kī

mashq hai aaj kā match aane vaale kal ke liye

aur kal jo match hogā apnī jagah vo final hī kyuuñ na ho

mashq hogā parsoñ ke match kī

haDDiyāñ gal ga.iiñ itnī saada sī baat samajhte samajhte

ki har din tulū hotā hai apne saath ek nayā savāl ek nayā challenge le kar

aur mutāliba kartā hai ham se ek na.e javāb ek na.e tarz-e-amal kā

na to zindagī hī jāmid hai na zindagī kā ḳhāliq ḳhudā

zindagī bahte dariyā kī tarah badaltī rahtī hai har lahza qā.em-o-dā.em rahte hue

aur nit-na.ī taḳhlīq meñ masrūf ḳhudā bhī nahīñ hotā kabhī pahle vaalā ḳhudā

jab zindagī aur us ke ḳhāliq hī kī kaayā kalp hotī rahtī hai yuuñ

to ash.ār hoñ yā vāqi.āt o hādsāt badal jaatā hai hir shai kā mafhūm

bha.ī, badal jaate haiñ ham ḳhud badal jaatī hai hamārī nazar hamārā ehsās

badal jaatī haiñ vo mohabbateñ

jin ke azlī o abadī hone kī qasmeñ khāyā karte the ham

badal jaatī haiñ be-badal dostiyāñ

vo ḳhvāhisheñ badal jaatī haiñ jinhoñ ne

ek umr pāgal banā.e rakhā hotā hai hameñ

aur to aur badal jaate haiñ diin aur īmān

rāste hī nahīñ badal jaatī haiñ manzileñ

sun rahe haiñ aap

bhar to nahīñ paa.e aap bhii?

kidhar chal diye aap?

badal to nahīñ ga.e aap bhii?

barson baad bar-nok-e-zaban rahta hai koi sher

phir ek din

us ke jaane pahchane hazar martaba dohrae hue alfaz ke andar

khul jata hai maani ka ek naya darwaza

aur rah jate hain hum hakka-bakka

jis mafhum par sar dhunte aae the kal tak kitna sathi kitna adhura tha wo

shukr karte hain ki nahin puchh liya kisi ne hum se is sher ka matlab

satya-nas kar Dalte achchhe bhale sher ka in nae maani ke baghair hum

yahi kuchh hota hai zindagi mein pesh aane wale

waqiat o hadsat ke sath bhi

jo kuchh bit gaya aur bit raha hai hum par

der tak raaz hi nahin khulta us ki ahmiyat ka

be-maqsad ho raha hai ye sab kuchh

ya is ka hamare mustaqbil aur muqaddar se bhi talluq hai kuchh

phir parda sa haTta hai aur ho jate hain hum gharq-e-hairat

kitna mahdud tha hamara naqd-e-ilm

aur kin mughaaliton mein paDe hue the hum

mujhe to KHugar sa bana diya hai roz-marra ki is hairani o pareshani ne

nae se naya sadma sahne ko tayyar rahta hun subh o sham

apni jahaalat ke inkishaf par

one-day cricket to shauq se dekhte hain aap bhi

yun samajhiye ki mashq tha guzishta kal ka match aaj ke match ki

mashq hai aaj ka match aane wale kal ke liye

aur kal jo match hoga apni jagah wo final hi kyun na ho

mashq hoga parson ke match ki

haDDiyan gal gain itni sada si baat samajhte samajhte

ki har din tulu hota hai apne sath ek naya sawal ek naya challenge le kar

aur mutaliba karta hai hum se ek nae jawab ek nae tarz-e-amal ka

na to zindagi hi jamid hai na zindagi ka KHaliq KHuda

zindagi bahte dariya ki tarah badalti rahti hai har lahza qaem-o-daem rahte hue

aur nit-nai taKHliq mein masruf KHuda bhi nahin hota kabhi pahle wala KHuda

jab zindagi aur us ke KHaliq hi ki kaya kalp hoti rahti hai yun

to ashaar hon ya waqiat o hadsat badal jata hai hir shai ka mafhum

bhai, badal jate hain hum KHud badal jati hai hamari nazar hamara ehsas

badal jati hain wo mohabbaten

jin ke azli o abadi hone ki qasmen khaya karte the hum

badal jati hain be-badal dostiyan

wo KHwahishen badal jati hain jinhon ne

ek umr pagal banae rakha hota hai hamein

aur to aur badal jate hain din aur iman

raste hi nahin badal jati hain manzilen

sun rahe hain aap

bhar to nahin pae aap bhi?

kidhar chal diye aap?

badal to nahin gae aap bhi?