mausam ki wirasat

khet pyāse haiñ

fazā hāñptī hai

jā-ba-jā ukhḌī jaḌeñ chāTtī ik gaa.e

ke sūkhe hue maTiyāle khuroñ kī mānind

phaT ga.ī hai jo zamīñ

us meñ ugī jhāḌiyāñ

be-barg-o-samar rahtī haiñ

mausam ho koī

kisī fālij-zada bīmār ke akḌe hue panje kī tarah

Tahniyāñ so.e falak dekhtī fariyād-kunāñ haiñ kab se

mahz fariyād se ai dost magar kyā hogā

joḌtā rahtā hai mausam kī virāsat se diloñ ko

jo kisī mez-numā shai ye ka.ī din se paḌā

chā.e-ḳhāne kā phaTā sā aḳhbār

ik nazar aao ise dekh to leñ

haal aisā hai ki ab jo bhī ho achchhā hogā

khet pyase hain

faza hanpti hai

ja-ba-ja ukhDi jaDen chaTti ek gae

ke sukhe hue maTiyale khuron ki manind

phaT gai hai jo zamin

us mein ugi jhaDiyan

be-barg-o-samar rahti hain

mausam ho koi

kisi falij-zada bimar ke akDe hue panje ki tarah

Tahniyan soe falak dekhti fariyaad-kunan hain kab se

mahz fariyaad se ai dost magar kya hoga

joDta rahta hai mausam ki wirasat se dilon ko

jo kisi mez-numa shai ye kai din se paDa

chae-KHane ka phaTa sa aKHbar

ek nazar aao ise dekh to len

haal aisa hai ki ab jo bhi ho achchha hoga