mausam mere dil ke

mere ghar ke āñgan meñ to

jaane pahchāne sab mausam

apne vaqt pe aa jaate haiñ

mausam-e-gul meñ

surḳh gulāb aur piilā geñdā

ujlā belā gorī chamelī

champā aur gul-e-dā.ūdī

kitne rang bikhar jaate haiñ

phir mausam karvaT letā hai

yaḳh-basta be-mehr havā

jab raqs-e-zamistāñ kā āġhāz kiyā kartī hai

saarā āñgan zard shikasta-jāñ pattoñ se bhar jaatā hai

mere dil ke āñgan meñ bhī

ye jaane pahchāne mausam aate jaate rahte haiñ

lekin ye ik baat ajab hai

kisht-e-dil meñ jitnī qismoñ ke bhī phuul khilā karte haiñ

saare surḳh huā karte haiñ

aur patjhaḌ meñ yaḳh-basta be-mehr havā

jab raqs-e-zamistāñ kā āġhāz kiyā kartī hai

shāḳhoñ se girne vaale patte bhī

sabz huā karte haiñ

mere ghar ke aangan mein to

jaane pahchane sab mausam

apne waqt pe aa jate hain

mausam-e-gul mein

surKH gulab aur pila genda

ujla bela gori chameli

champa aur gul-e-daudi

kitne rang bikhar jate hain

phir mausam karwaT leta hai

yaKH-basta be-mehr hawa

jab raqs-e-zamistan ka aaghaz kiya karti hai

sara aangan zard shikasta-jaan patton se bhar jata hai

mere dil ke aangan mein bhi

ye jaane pahchane mausam aate jate rahte hain

lekin ye ek baat ajab hai

kisht-e-dil mein jitni qismon ke bhi phul khila karte hain

sare surKH hua karte hain

aur patjhaD mein yaKH-basta be-mehr hawa

jab raqs-e-zamistan ka aaghaz kiya karti hai

shaKHon se girne wale patte bhi

sabz hua karte hain