maut ka sal

ye ahd-e-nau kā chalan hai yā ye shauq tumhārā azalī hai

tum calender tārīḳhoñ ko

kisī aur hī naam se jānte ho

yaañ jazbe rishte fikr aur fard ayyām se haiñ mansūb sabhī

kabhī darmāñ karnā chāhā kuchh amrāz kā de kar din kā ḳhirāj

jangeñ bhī tumhārī hī ījād

aur yaum-e-aman kā Dhoñg bhī tum

tum vo jo sūrat-e-qahr gire

is rū-e-zamīñ ke shahroñ par

phir un shahroñ ke naam se din mansūb bhī karne vaale tum

haañ bhuul ga.e us hastī ko

maḳhsūs koī bhī yaum nahīñ hai us ke jashn-e-charāġhāñ ko

ho jis kī siyah-zulfoñ ke asiir avval din se

kyā kyā nahīñ hiile tum ne kiye

merī hī talab kī unglī thāme atom bam ījād kiyā

kabhī zer-e-zamīñ rāh-e-ātish hamvār kiyā

kabhī dekhā chashm-e-falak ne manzar jab

tum thaam ke bāheñ merī the masrūr bahut

ik ahd-e-hajar se masnūī fatānat tak

jab bhī koī ḳhūñ-āshām sadā Takrā.ī mere kānoñ se

maiñ pair meñ ghuñghrū bāñdh uThī

inkār kiyā tum ne jab mere jashn-e-charāġhāñ kā

maiñ ne ik saal mukammal apne naam kiyā

lekin tum ne

harf-e-ġhalat kā naam diyā

chāhā ki kar do mahv mujhe is rū-e-zamīñ ke safhe se

sāl-e-nau kī is ujlī tābinda fazā meñ

faisla apne haath meñ lo

yā merī parastish band karo

yā mere naam ik jaam karo

chērs kaho

ye saal bhī mere naam karo

ye ahd-e-nau ka chalan hai ya ye shauq tumhaara azali hai

tum calender tariKHon ko

kisi aur hi nam se jaante ho

yan jazbe rishte fikr aur fard ayyam se hain mansub sabhi

kabhi darman karna chaha kuchh amraaz ka de kar din ka KHiraj

jangen bhi tumhaari hi ijad

aur yaum-e-aman ka Dhong bhi tum

tum wo jo surat-e-qahr gire

is ru-e-zamin ke shahron par

phir un shahron ke nam se din mansub bhi karne wale tum

han bhul gae us hasti ko

maKHsus koi bhi yaum nahin hai us ke jashn-e-charaghan ko

ho jis ki siyah-zulfon ke asir awwal din se

kya kya nahin hile tum ne kiye

meri hi talab ki ungli thame atom bam ijad kiya

kabhi zer-e-zamin rah-e-atish hamwar kiya

kabhi dekha chashm-e-falak ne manzar jab

tum tham ke bahen meri the masrur bahut

ek ahd-e-hajar se masnui fatanat tak

jab bhi koi KHun-asham sada Takrai mere kanon se

main pair mein ghunghru bandh uThi

inkar kiya tum ne jab mere jashn-e-charaghan ka

main ne ek sal mukammal apne nam kiya

lekin tum ne

harf-e-ghalat ka nam diya

chaha ki kar do mahw mujhe is ru-e-zamin ke safhe se

sal-e-nau ki is ujli tabinda faza mein

faisla apne hath mein lo

ya meri parastish band karo

ya mere nam ek jam karo

cheers kaho

ye sal bhi mere nam karo