maut kis ne banTi hai

raat ke añdhere meñ

aaj phir dabe paañv

sarsarātī sargoshī

phan uThā ke chaltī hai

vaqt ret kī mānind

haath se phisaltā hai

niiñd mujh se rūThī hai

bhuuk raqs kartī hai

pyaas chubhne lagtī hai

saañs kyuuñ aTaktī hai

jhāñko merī āñkhoñ meñ

aks dekh lo apnā

aur mujhe ye batlā do

kyā tumheñ khaTaktā hai

kyuuñ gurezāñ ho mujh se

kyā meñ bojh lagtī huuñ

kyuuñ machal sī jaatī ho

haath bhī baḌhātī ho

phir pare khisaktī ho

haath khol do mere

bhīñch lo nā siine meñ

gaal chhūne do apne

gar nahīñ rahī kal maiñ

lams to rahegā nā

ye sadā.eñ kaisī haiñ

jin kī guuñj se mere

kaan sansanāte haiñ

kis kī siskiyāñ haiñ ye

zindagī kī yā tum ho

maut to nahīñ nā ye

maut gar nahīñ hai ye

āhaTeñ haiñ phir kis kī

kyuuñ ghuTan kā pahra hai

kyā mujhe janam de kar

tum ne maut bāñTī hai

raat ke andhere mein

aaj phir dabe panw

sarsaraati sargoshi

phan uTha ke chalti hai

waqt ret ki manind

hath se phisalta hai

nind mujh se ruThi hai

bhuk raqs karti hai

pyas chubhne lagti hai

sans kyun aTakti hai

jhanko meri aankhon mein

aks dekh lo apna

aur mujhe ye batla do

kya tumhein khaTakta hai

kyun gurezan ho mujh se

kya mein bojh lagti hun

kyun machal si jati ho

hath bhi baDhati ho

phir pare khisakti ho

hath khol do mere

bhinch lo na sine mein

gal chhune do apne

gar nahin rahi kal main

lams to rahega na

ye sadaen kaisi hain

jin ki gunj se mere

kan sansanate hain

kis ki siskiyan hain ye

zindagi ki ya tum ho

maut to nahin na ye

maut gar nahin hai ye

aahaTen hain phir kis ki

kyun ghuTan ka pahra hai

kya mujhe janam de kar

tum ne maut banTi hai