may yaum-ul-hisab

mujhe be-rahm hastī ke ziyāñ-ḳhāne meñ kyuuñ bhejā gayā

kyuuñ halqa-e-zanjīr meñ rakh dī ga.iiñ be-tābiyāñ merī

har ik manzar mirī nazroñ kā juuyā thā

farozāñ shāḳh-sāroñ par hujūm-e-rañg-o-bū

uḌtā huā bar-ravāñ

sīmāb-pā maujeñ

sabā kā raqs-e-be-parvā

shab-e-mahtāb kā afsūñ

mah-o-anjum ke raqsāñ dā.ere

rū-e-shafaq

tābāñ ufuq

dariyāoñ kī raftār

shab ke jāgte asrār

sahrā kā munavvar sīna-e-uryāñ

tilism-e-be-karāñ ke ḳhvāb-gūñ saa.e

mirī rātoñ meñ misl-e-barq lahrā.e

sitāroñ kī tajallī meñ thā harf-e-kun kā afsāna

baḌā faiyyaz thā fitrat kā kāshāna

ka.ī sahrā mire gām-e-tamannā ke shanāsā the

vo harf-o-saut kī vaadī

vo zauq-e-sher kā jaada

vo irfāñ ke gurezāñ āstānoñ par jabīñ-sā.ī

vo dānish kī pazīrā.ī

vo ma.anī kī ghanerī chhāñv meñ

zehn-e-rasā kā kashf vo

asrār ke parde ke pīchhe

dil kī mahshar-ḳhez āvāzeñ

dil kī mahshar-ḳhez āvāzeñ

vo ġham-hā-e-nihānī se farozāñ zauq-e-bīnā.ī

vo dāman kā har ik ḳhār-e-muġhīlāñ se ulajhnā

tūl-o-arz dasht-o-dariyā paar kar jaanā

vo har zarre meñ dhartī kī sadā sunñā

vo har qatre ke ā.īne meñ

nūr-e-husn-e-mutlaq kā larazna

dil-e-nazar harf-o-hunar kā ek ho jaanā

takallum justujū raftār-o-ġham kā mudda.ā paanā

koī īsā-nafas detā thā nām-e-zīst nazrāna

laraztā iltihāb āgahī se thā mirī nazroñ kā paimāna

gurezāñ sā.atoñ ke kārvāñ ko kis ne pakḌā hai

nazar mahv-e-ma.āl-e-dosh-o-fardā hai

ka.ī dīvār-o-saqaf-o-sā.ibañ ke munjamid chehre

ka.ī ūñchī fasīleñ raah meñ haa.il

ka.ī be-faiz kāvish-hā-e-tanhā.ī

ka.ī be-mehriyāñ paikār be-mafhum pur-mā.il

ka.ī tīroñ ne merī ḳhema-gāh-e-shaq ko chedā

ka.ī tarkash hue is jism par ḳhālī

huī jaatī hai razm-e-zindagānī muzmahil ghāyal

nishāt-o-dard kī vo ḳhosha-chīnī chhoḌ dī ham ne

anān-e-husn-e-imkāñ toḌ dī ham ne

sukūn shaam hai

bujhne lage saare ayāġh-e-garm-raftārī

shikasta-tār hastī kī tarah larzāñ haiñ

gird-o-pesh ke shab-tāb nazāre

vo saa.at aan pahuñchī hai

nigāh-e-vāpsīñ ke muntazir haiñ TūTte taare

mujhe shāyad himāla kī falak-paimā.iyāñ āvāz detī haiñ

maiñ apnī maut se

in barf-zāroñ kī daraḳhshanda ma.ayyat meñ milūñgī

toḌ dūñgī halqa-e-zanjīr mahjūrī

mujhe be-rahm hasti ke ziyan-KHane mein kyun bheja gaya

kyun halqa-e-zanjir mein rakh di gain be-tabiyan meri

har ek manzar meri nazron ka juya tha

farozan shaKH-saron par hujum-e-rang-o-bu

uDta hua bar-rawan

simab-pa maujen

saba ka raqs-e-be-parwa

shab-e-mahtab ka afsun

mah-o-anjum ke raqsan daere

ru-e-shafaq

taban ufuq

dariyaon ki raftar

shab ke jagte asrar

sahra ka munawwar sina-e-uryan

tilism-e-be-karan ke KHwab-gun sae

meri raaton mein misl-e-barq lahrae

sitaron ki tajalli mein tha harf-e-kun ka afsana

baDa faiyyaz tha fitrat ka kashana

kai sahra mere gam-e-tamanna ke shanasa the

wo harf-o-saut ki wadi

wo zauq-e-sher ka jada

wo irfan ke gurezan aastanon par jabin-sai

wo danish ki pazirai

wo mani ki ghaneri chhanw mein

zehn-e-rasa ka kashf wo

asrar ke parde ke pichhe

dil ki mahshar-KHez aawazen

dil ki mahshar-KHez aawazen

wo gham-ha-e-nihani se farozan zauq-e-binai

wo daman ka har ek KHar-e-mughilan se ulajhna

tul-o-arz dasht-o-dariya par kar jaana

wo har zarre mein dharti ki sada sunna

wo har qatre ke aaine mein

nur-e-husn-e-mutlaq ka larazna

dil-e-nazar harf-o-hunar ka ek ho jaana

takallum justuju raftar-o-gham ka muddaa pana

koi isa-nafas deta tha nam-e-zist nazrana

larazta iltihab aagahi se tha meri nazron ka paimana

gurezan saaton ke karwan ko kis ne pakDa hai

nazar mahw-e-maal-e-dosh-o-farda hai

kai diwar-o-saqaf-o-saiban ke munjamid chehre

kai unchi fasilen rah mein hail

kai be-faiz kawish-ha-e-tanhai

kai be-mehriyan paikar be-mafhum pur-mail

kai tiron ne meri KHema-gah-e-shaq ko cheda

kai tarkash hue is jism par KHali

hui jati hai razm-e-zindagani muzmahil ghayal

nishat-o-dard ki wo KHosha-chini chhoD di hum ne

anan-e-husn-e-imkan toD di hum ne

sukun sham hai

bujhne lage sare ayagh-e-garm-raftari

shikasta-tar hasti ki tarah larzan hain

gird-o-pesh ke shab-tab nazare

wo saat aan pahunchi hai

nigah-e-wapsin ke muntazir hain TuTte tare

mujhe shayad himala ki falak-paimaiyan aawaz deti hain

main apni maut se

in barf-zaron ki daraKHshanda mayyat mein milungi

toD dungi halqa-e-zanjir mahjuri