mehman-e-KHosusi

ek din hazrat-e-hāfiz ne ye dekhā manzar

tauq-e-zarrīñ se muzayyan hai hama gardan-e-ḳhar

aur chhakḌe meñ jutā reñg rahā hai taazī

zaḳhm hī zaḳhm hai koḌe kā zi-sar tā-ba-kamar

the jau marhūm baḌe sāda-dil o nek-mizāj

''īñ-che shorīst'' kahā aur gire chakrā kar

vo to is ġham ko liye ḳhuld-e-barīñ meñ pahuñche

ka.ī sadiyoñ kā zamāne ne lagāyā chakkar

aaj ham par bhī magar jabr-e-nazāra hai vahī

vahī nairañg-e-tamāshā vahī nairañg-e-nazar

vo charā-gāh-e-siyāsat ho ki maidān-e-adab

tauq-e-zarrīñ hai vahī aur vahī gardan-e-ḳhar

iḳhtiyārāt kī kursī pe ḳhrān-e-farba

mutamakkin nazar aate haiñ ba-sad karr-o-farr

ek kursī pe kisī tarah uchak kar pahuñche

aur phir dhaḌ se khule kashf-o-karāmāt ke dar

phir to 'buqrāt' aur 'arastū'-e-zamāna haiñ vo

ilm o hikmat meñ nahīñ phir koī un kā ham-sar

phir to sahrā-e-jahālat bhī hai dariyā-e-ulūm

phir to is be-hunarī meñ bhī haiñ sau sau jauhar

ḳhvāh do harf bhī ta.alīm na hāsil kī ho

tauq-e-zarrīñ ke karishme se bane dānish-var

koī jalsa ho vo ''mehmān-e-ḳhosūsī'' hoñge

koī mauqa.a ho dhaḌalle se vo deñge lecture

vo zamīñ ke hoñ masā.il ke ḳhalā kī bāteñ

misl-e-miqrāz zabāñ chaltī rahegī far-far

aalim o fāzil o dānish-var o ahl-e-hikmat

sab nazar ā.eñge qadmoñ pe jhukā.e hue sar

tauq-e-zarrīñ kā jo is ko na karishma kahiye

nātiqa sar-ba-girebāñ ki ise kyā kahiye

ek din hazrat-e-hafiz ne ye dekha manzar

tauq-e-zarrin se muzayyan hai hama gardan-e-KHar

aur chhakDe mein juta reng raha hai tazi

zaKHm hi zaKHm hai koDe ka zi-sar ta-ba-kamar

the jau marhum baDe sada-dil o nek-mizaj

in-che shorist kaha aur gire chakra kar

wo to is gham ko liye KHuld-e-barin mein pahunche

kai sadiyon ka zamane ne lagaya chakkar

aaj hum par bhi magar jabr-e-nazara hai wahi

wahi nairang-e-tamasha wahi nairang-e-nazar

wo chara-gah-e-siyasat ho ki maidan-e-adab

tauq-e-zarrin hai wahi aur wahi gardan-e-KHar

iKHtiyaraat ki kursi pe KHran-e-farba

mutamakkin nazar aate hain ba-sad karr-o-farr

ek kursi pe kisi tarah uchak kar pahunche

aur phir dhaD se khule kashf-o-karamat ke dar

phir to 'buqraat' aur 'arastu'-e-zamana hain wo

ilm o hikmat mein nahin phir koi un ka ham-sar

phir to sahra-e-jahaalat bhi hai dariya-e-ulum

phir to is be-hunari mein bhi hain sau sau jauhar

KHwah do harf bhi talim na hasil ki ho

tauq-e-zarrin ke karishme se bane danish-war

koi jalsa ho wo mehman-e-KHosusi honge

koi mauqa ho dhaDalle se wo denge lecture

wo zamin ke hon masail ke KHala ki baaten

misl-e-miqraaz zaban chalti rahegi far-far

aalim o fazil o danish-war o ahl-e-hikmat

sab nazar aaenge qadmon pe jhukae hue sar

tauq-e-zarrin ka jo is ko na karishma kahiye

natiqa sar-ba-gireban ki ise kya kahiye