mera safar qadam qadam

niklā huuñ ḳhud ko DhūñDne is kā magar hai mujh ko ġham

rāh-e-junūñ darāz hai merā safar qadam qadam

mujh ko ḳhabar nahīñ ki yaañ kitne luTe haiñ kārvāñ

kitnī girī haiñ bijliyāñ kitne jale haiñ āshiyāñ

chaak hai parda-e-vajūd phir bhī koī mirā nahīñ

kaun hai jis ke vāste hukm-e-sazā jazā nahīñ

ālam-e-āb-o-ḳhāk meñ merā zuhūr bhī hijāb

hashr meñ sab ke sāmne merā amal hai be-naqāb

merī tamām zindagī ma.arka-hā.e-ḳhair-o-shar

merī nigāh-e-arsh par maiñ kaf-e-ḳhāk-o-ḳhud-nigar

mere liye haiñ do jahāñ maiñ huuñ ḳhudā ke vāste

merā vajūd aa.ina ahl-e-safā ke vāste

jis meñ ki ḳhūb-o-zisht kā madd-o-jazar hai saaf saaf

manzar-e-dozaḳh-o-bahisht pesh-e-nazar hai saaf saaf

rāh-e-bad-o-rāh-e-najāt haiñ mere iḳhtiyār meñ

ġham haiñ magar ye rāste rañg-ba-rañg ġhubār meñ

hirs-o-havā kī Dher par apne qadam jamā ke rakh

teġh-e-zamāna tez hai sar ko bachā bachā ke rakh

kār-e-gah-e-hayāt meñ rakh le ḳhud apnī aabrū

terā maqām-e-bandagī kaam hai terā aarzū

ḳhud dil-o-jigar se kar jazb-e-darūñ kī parvarish

karte raheñ zamīr ko ishq ke naġhme murta.ish

sun le mire 'nadīm' sun 'iqbāl' ke thā dard-e-lab

ishq-e-tamām-e-mustafā aql-e-tamām bū-lahab

hāsil-e-ishq-e-mustafā un se nizām-e-kā.enāt

un ke baġhair shar.a-o-dīn but-kada-e-tasavvurāt

apnī ḳhudī kī oT se jalva-e-be-hijāb dekh

qalb-o-nazar ko paak rakh yaar ko be-naqāb dekh

nikla hun KHud ko DhunDne is ka magar hai mujh ko gham

rah-e-junun daraaz hai mera safar qadam qadam

mujh ko KHabar nahin ki yan kitne luTe hain karwan

kitni giri hain bijliyan kitne jale hain aashiyan

chaak hai parda-e-wajud phir bhi koi mera nahin

kaun hai jis ke waste hukm-e-saza jaza nahin

aalam-e-ab-o-KHak mein mera zuhur bhi hijab

hashr mein sab ke samne mera amal hai be-naqab

meri tamam zindagi marka-hae-KHair-o-shar

meri nigah-e-arsh par main kaf-e-KHak-o-KHud-nigar

mere liye hain do jahan main hun KHuda ke waste

mera wajud aaina ahl-e-safa ke waste

jis mein ki KHub-o-zisht ka madd-o-jazar hai saf saf

manzar-e-dozaKH-o-bahisht pesh-e-nazar hai saf saf

rah-e-bad-o-rah-e-najat hain mere iKHtiyar mein

gham hain magar ye raste rang-ba-rang ghubar mein

hirs-o-hawa ki Dher par apne qadam jama ke rakh

tegh-e-zamana tez hai sar ko bacha bacha ke rakh

kar-e-gah-e-hayat mein rakh le KHud apni aabru

tera maqam-e-bandagi kaam hai tera aarzu

KHud dil-o-jigar se kar jazb-e-darun ki parwarish

karte rahen zamir ko ishq ke naghme murtaish

sun le mere 'nadim' sun 'iqbaal' ke tha dard-e-lab

ishq-e-tamam-e-mustafa aql-e-tamam bu-lahab

hasil-e-ishq-e-mustafa un se nizam-e-kaenat

un ke baghair shara-o-din but-kada-e-tasawwuraat

apni KHudi ki oT se jalwa-e-be-hijab dekh

qalb-o-nazar ko pak rakh yar ko be-naqab dekh